പാലക്കുന്ന്: കോട്ടിക്കുളത്ത് കര്ണാടക സ്വദേശിയായ യുവാവിനെ കൊലപ്പെടുത്തിയത് ആസൂത്രിതമായാണെന്ന് സൂചന. കൊലപാതകം മറച്ചു വെച്ച് വാഹനാപകടമാണെന്ന് വരുത്തി തീര്ക്കുന്നതിനുള്ള ശ്രമവും കൊലയാളി നടത്തി. കൊല നടത്തിയതിന് ശേഷം സ്ഥലത്ത് ഉണ്ടായിരുന്ന വലിയ ടയര് മൃതദേഹത്തിന്റെ നെഞ്ചിനുമുകളിലൂടെ അമര്ത്തി ഉരുട്ടിയതായും വ്യക്തമായിട്ടുണ്ട്.
വ്യാഴാഴ്ച പുലര്ച്ചെ പള്ളിയിലേക്ക് നടന്നു പോകുന്നവരാണ് കടവരാന്തയില് ഒരാളെ മരിച്ചു കിടക്കുന്ന നിലയില് കണ്ടെത്തിയത്. മുറിവുകളില് നിന്ന് രക്തം ഒലിക്കുന്ന നിലയിലായിരുന്നു മൃതദേഹം. വിവരമറിഞ്ഞ് ബേക്കല് ഡിവൈഎസ്പി കെ.എം ബിജുവിന്റെ നേതൃത്വത്തില് എത്തിയ പോലീസ് സംഘം സമീപത്തെ സിസിടിവി ക്യാമറയിലെ ദൃശ്യങ്ങള് പരിശോധിച്ചു. രാത്രിയില് സമീപത്തെ ആള്താമസമില്ലാത്ത വീട്ടില് നിന്ന് ഒരാളുടെ മൃതദേഹം ചാക്കില് കിടത്തി വലിച്ചിഴച്ച് കൊണ്ടുവരുന്ന ദൃശ്യങ്ങള് ക്യാമറയില് പതിഞ്ഞിരുന്നു.
കര്ണ്ണാടക സ്വദേശിയായ സ്ഥലത്തെ ഒരു സ്ഥാപനത്തിന്റെ കാവല്ക്കാരനാണ് ദൃശ്യത്തിലുണ്ടായിരുന്നത്. ഇയാള് പോലീസ് നിരീക്ഷണത്തിലാണ്. സ്ഥലത്ത് നിന്ന് മംഗ്ളൂരുവിലേക്ക് യാത്ര ചെയ്തതിന്റെ തെളിവായി രണ്ട് ടിക്കറ്റുകള് ലഭിച്ചിട്ടുണ്ട്. കൊല്ലപ്പെട്ട ആളും കൊലയാളിയായ യുവാവും മംഗ്ളൂരുവിലേക്ക് പോവുകയും മദ്യപിക്കുകയും മദ്യം പാര്സലായി വാങ്ങി വരികയും ചെയ്തതായി പോലീസ് അന്വേഷണത്തില് വ്യക്തമായിട്ടുണ്ട്. അതിനു ശേഷം രാത്രി ആള്താമസമില്ലാത്ത വീട്ടില് വെച്ച് ഇരുവരും വാക്കു തര്ക്കമുണ്ടാവുകയും കൊല നടക്കുകയായിരുന്നുവെന്നും ഉറപ്പാക്കിയിട്ടുണ്ട്.
