കോട്ടയം : പാലായില് ജോസ് കെ. മാണിക്കെതിരെ വ്യാപകമായി പോസ്റ്ററുകള്. കേരളാ കോണ്ഗ്രസ് നേതാവ് ജോസ് കെ. മാണി കുലം കുത്തിയാണെന്നും പോളിങ് സ്റ്റേഷനില് ചെല്ലുമ്പോള് ഇക്കാര്യം ഓര്ക്കണമെന്നും പോസ്റ്ററില് ചൂണ്ടിക്കാട്ടുന്നു. സേവ് സിപിഐഎമ്മിന്റെ പേരിലാണ് പോസ്റ്ററുകള് പ്രത്യക്ഷപ്പെട്ടിരിക്കുന്നത്.
പാലാ നഗരസഭയിലെ സിപിഐഎം കേരള കോണ്ഗ്രസ് അംഗങ്ങള് തമ്മില് ബുധനാഴ്ച വാക്കേറ്റം ഉണ്ടാവുകയും, തുടര്ന്നത് കൈയ്യാങ്കളിയിലേക്ക് എത്തുകയും ചെയ്തിരുന്നു. ഇതിന് പിന്നാലെയാണ് പാലാ നഗരത്തിലെ വിവിധയിടങ്ങളില് പോസ്റ്റര് പ്രത്യക്ഷപ്പെട്ടിരിക്കുന്നത്.
എല്ഡിഎഫുമായി സഖ്യത്തില് ആയെങ്കിലും കേരള കോണ്ഗ്രസ്സുമായുള്ള ബന്ധത്തില് ഇടത് മുന്നണിക്കുള്ളില് അഭിപ്രായ വ്യത്യാസങ്ങള് ഇപ്പോഴും നിലനില്ക്കുന്നുണ്ടെന്നാണ് പോസ്റ്ററിലൂടെ സൂചന നല്കുന്നത്. ഇടത് മുന്നണിയുടെ ഭാഗമായി നിന്ന് ജോസ് കെ. മാണി വിഭാഗം നേരിടുന്ന ആദ്യ തെരഞ്ഞെടുപ്പാണ് ഇത്തവണത്തേത്. അതുകൊണ്ടുതന്നെ ഇത് പാര്ട്ടിക്ക് നിര്ണ്ണായകമാണ്.
അതേസമയം നഗരസഭയിലുണ്ടായ പ്രശ്നങ്ങള് വ്യക്തി പരമാണെന്നും തെരഞ്ഞെടുപ്പിനെ അത് ബാധിക്കില്ലെന്നും ജോസ് കെ മാണി പ്രതികരിച്ചു. പാലായില് എല്ഡിഎഫ് ഒറ്റക്കെട്ടാണ്. നഗരസഭയില് അരങ്ങേറിയ സംഭവങ്ങള് തെരഞ്ഞെടുപ്പിനെ ബാധിക്കില്ല സിപിഎമ്മും കേരള കോണ്ഗ്രസ്സും തമ്മില് പ്രശ്നങ്ങള് ഇല്ലെന്നും ജോസ് കെ. മാണി കൂട്ടിച്ചേര്ത്തു.
