വാഷിങ്ടണ്‍ : യുഎസിലെ കൊളാറാഡോയില്‍ വെടിവെപ്പ്. പോലീസ് ഉദ്യോഗസ്ഥന്‍ ഉള്‍പ്പടെ പത്ത് പേര്‍ കൊല്ലപ്പെട്ടു. ബോള്‍ഡന്‍ നഗരത്തിലെ ഗ്രോസറി കടയിലാണ് വെടിവെപ്പ് ഉണ്ടായത്. പുലര്‍ച്ചയോടെയാണ് സംഭവം.
ഷര്‍ട്ട് ധരിക്കാതെ സൂപ്പര്‍മാര്‍ക്കറ്റിലെത്തിയ ആക്രമി അവിടെയുണ്ടായിരുന്ന ആളുകള്‍ക്ക് നേരെ വെടിയുതിര്‍ക്കുകയായിരുന്നെന്ന് ദൃക്‌സാക്ഷികള്‍ അറിയിച്ചു. സംഭവ ശേഷം രക്ഷപ്പെടാന്‍ ശ്രമിച്ച അക്രമിയെ പോലീസ് പിടികൂടി. വെടിവെപ്പില്‍ നിരവധി പേര്‍ക്ക് പരിക്കേറ്റിട്ടുണ്ടെന്നാണ് റിപ്പോര്‍ട്ടുകള്‍.
സംഭവത്തില്‍ പോലീസ് അന്വേഷണം ആരംഭിച്ചു. സംഭവസ്ഥലത്ത് പോലീസ് എത്തി വിവരങ്ങള്‍ ശേഖരിച്ചുവരികയാണ്. വിവരം അറിഞ്ഞ പ്രസിഡന്റ് ജോ ബൈഡന്‍ സ്ഥിതിഗതികള്‍ വിലയിരുത്തി. അമേരിക്കയില്‍ കഴിഞ്ഞ രണ്ടാഴ്ചയ്‌ക്കിടെ ഉണ്ടാകുന്ന രണ്ടാമത്തെ സംഭവമാണ് ഇത്. അടുത്തിടെ അറ്റ്ലാന്റയിലുണ്ടായ വെടിവെപ്പില്‍ എട്ട് പേര്‍ മരിച്ചിരുന്നു.
