ബെര്‍മിങ്ഹാം: ഇന്ത്യന്‍ താരം പി.വി. സിന്ധു ഓള്‍ ഇംഗ്ലണ്ട് ബാഡ്്മിന്റണ്‍ ചാമ്പ്യന്‍ഷിപ്പിന്റെ സെമിഫൈനലില്‍ പുറത്തായി. തായ്‌ലന്‍ഡിന്റെ പോണ്‍പാവി ചോചുവോങ്ങിനോട് നേരിട്ടുള്ള ഗെയിമുകള്‍ക്ക് തോറ്റു. സ്‌കോര്‍: 17-21, 9-21.
ക്ലാസിക് പോരാട്ടത്തില്‍ അകനെ യാമാഗൂച്ചിയെ കീഴടക്കി സെമിയിലെത്തിയ സിന്ധുവിന് പോണ്‍പാവിക്കെതിരെ മികവ് നിലനിര്‍ത്താനായില്ല. ആദ്യ ഗെയിമില്‍ മാത്രമാണ് അല്‍പ്പമൊന്ന് പൊരുതിയത്. 21-17 ന്് പോണ്‍പാവി ആദ്യ ഗെയിം സ്വന്തമാക്കി. രണ്ടാം ഗെയിമില്‍ സിന്ധു തീര്‍ത്തും നിറം മങ്ങി. ഒമ്പത് പോയിന്റ് മാത്രമാണ് നേടാനായത്. 21-9 ന് ഗെയിം നേടി പോണ്‍പാവി ഫൈനലില്‍ കടന്നു. ഇതാദ്യമായാണ് ഈ തായ്‌ലന്‍ഡ് താരം ഓള്‍ ഇംഗ്ലണ്ട് ബാഡ്മിന്റണ്‍ ചാമ്പ്യന്‍ഷിപ്പിന്റെ ഫൈനലില്‍ കടക്കുന്നത്.
ക്വാര്‍ട്ടര്‍ ഫൈനലില്‍ ഒന്നിനെതിരെ രണ്ട് ഗെയിമുകള്‍ക്കാണ് സിന്ധു അകനെ യാമാഗൂച്ചിയെ കീഴ്‌പ്പെടുത്തിയത്.
ആദ്യ ഗെയിം നഷ്ടമായ സിന്ധു ശക്തമായി തിരിച്ചുവരികയായിരുന്നു.
സ്‌കോര്‍: 16-21, 21-16, 21-19. മത്സരം എഴുപത്തിയാറ് മിനിറ്റ് നീണ്ടു. ഇത് രണ്ടാം തവണയാണ് സിന്ധു ഓള്‍ ഇംഗ്ലണ്ട്് ബാഡ്മിന്റണ്‍ ചാമ്പ്യന്‍ഷിപ്പിന്റെ സെമിയിലെത്തുന്നത്.
ഴാങ്ങിനെ നേരിട്ടുള്ള ഗെയിമുകള്‍ക്ക് തോല്‍പ്പിച്ചാണ് പോണ്‍പാവി സെമിയിലെത്തിയത്. സ്‌കോര്‍: 21-16, 21-19.
