ദോഹ: ഖത്തറില് കൊവിഡ് മുന്കരുതല് നടപടികള് ലംഘിച്ച 370 പേര്ക്കെതിരെ കൂടി പോലീസ് നടപടിയെടുത്തു. പുറത്തിറങ്ങുമ്പോള് മാസ്ക് ധരിക്കാത്തതിനാണ് 359 പേര്ക്കെതിരെ നടപടിയെടുത്തത്. കാറില് അനുവദനീയമായ എണ്ണത്തില് കൂടുതല് യാത്രക്കാരുമായി സഞ്ചരിച്ചതിന് 10 പേര്ക്കെതിരെയും നടപടിയെടുത്തു.
മൊബൈലില് ഇഹ്തിറാസ് ആപ്പ് ഡൗണ്ലോഡ് ചെയ്യാത്തതിന് ഒരാള്ക്കെതിരെയും നടപടിയുണ്ടായി. പിടിയിലായവരെ പബ്ലിക് പ്രോസിക്യൂഷന് കൈമാറി. രാജ്യത്ത് പുറത്തിറങ്ങുമ്പോള് മാസ്ക് ധരിക്കണമെന്നത് നിര്ബന്ധമാണ്. കൊവിഡ് പ്രതിരോധ നടപടികളുടെ ഭാഗമായി കാറില് ഒരു കുടുംബത്തില് നിന്നുള്ളവരൊഴികെ നാലുപേരില് കൂടുതല് യാത്ര ചെയ്യരുതെന്നും നിര്ദ്ദേശമുണ്ട്. ലംഘിച്ചാല് കുറഞ്ഞത് ആയിരം റിയാല് പിഴ നല്കേണ്ടി വരും.
മാസ്ക് ധരിക്കാത്തതുമായി ബന്ധപ്പെട്ട നിയമലംഘനങ്ങള്ക്ക് സാംക്രമിക രോഗങ്ങള് തടയുന്നതിനുള്ള 1990ലെ 17-ാം നമ്പര് ഉത്തരവ് പ്രകാരമാണ് നടപടിയെടുക്കുക. രാജ്യത്ത് ഇതുവരെ 9,293 പേരെയാണ് മാസ്ക് ധരിക്കാത്തതിന് പബ്ലിക് പ്രോസിക്യൂഷന് കൈമാറിയത്. കാറില് അനുവദനീയമായതില് കൂടുതല് പേരെ കയറ്റിയതിന് 332 പേര്ക്കെതിരെയും നടപടിയെടുത്തു.
