എസ്. ബി. പണിക്കര്
അജീര്ണേ ഭേഷജം വാരി
ജീവേ വാരി ജലപ്രദം
ഭോജനേ ചാമൃതം വാരി
ഭോജനാന്തേ വിഷപ്രദം
ജലം ഒരേ സമയം ആഹാരവും ഔഷധവുമാണ്. ദഹനക്കേടുള്ളപ്പോള് ജലം ഔഷധവും, ആഹാരം ദഹിച്ചു കഴിഞ്ഞതിനു ശേഷം കുടിക്കുന്ന വെള്ളം ബലപ്രദവും ആഹാരം കഴിക്കുന്നതിനിടെ അല്പാല്പം കുടിക്കുന്ന ജലം അമൃതിനു സമവുമാണ്. എന്നാല് ആഹാര ശേഷം കുടിക്കുന്ന ജലം വിഷകരവുമാണെന്ന് ചാണക്യന് പറയുന്നു.
വെള്ളം അമിതമായി കുടിച്ചാല് ഭക്ഷണം ശരിയായി ദഹിക്കുകയില്ലെന്നും വെള്ളം കുടിക്കാതിരുന്നാലും ഇതേ അവസ്ഥയായിരിക്കുമെന്നും അതുകൊണ്ട് ദഹനാഗ്നി വര്ധിപ്പിക്കുന്നതിന് ആഹാരത്തിനിടയ്ക്ക് അല്പാല്പം വെള്ളം കുടിക്കണമെന്ന് ‘ക്ഷേമകുതൂഹല’കാരനും പറയുന്നു.
അമിത ജലപാനവും വയറുനിറച്ചുള്ള ഭക്ഷണവും മലമൂത്രാദി വേഗങ്ങളെ തടഞ്ഞു വയ്ക്കുന്നതും രോഗങ്ങള്ക്ക് ഇടവരുത്തുമെന്ന് ഗരുഡപുരാണവും വ്യക്തമാക്കുന്നു. വയോജനങ്ങളില് ശുദ്ധജലം കുടിക്കുന്ന ശീലം കുറഞ്ഞു വരുമെന്നും ബോധപൂര്വം ജലം കുടിക്കണമെന്നും ആധുനിക വൈദ്യശാസ്ത്രം ഉപദേശിക്കുന്നു.
ശരീരം ജലം ആവശ്യപ്പെടുന്നതാണ് ദാഹം. ജലത്തിന് അമൃതമെന്നും ജീവനമെന്നും പര്യായങ്ങളുണ്ട്. ജലം കുടിക്കാതിരുന്നാല് 15 ദിവസത്തില് കൂടുതല് ജീവിച്ചിരിക്കുകയില്ലെന്ന് ഛാന്ദോഗ്യോപനിഷത്ത് പറയുന്നു. ഏതായാലും ജലമില്ലാതെ സസ്യജീവജാലങ്ങള്ക്ക് നിലനില്പ്പില്ല. അതുകൊണ്ട് ജലം അമൃതമാകുന്നു.
