തൃശൂര്: ബിജെപി ദേശീയ അധ്യക്ഷന് ജെ.പി. നദ്ദയുടെ രണ്ട് ദിവസത്തെ സന്ദര്ശനം സംസ്ഥാനത്ത് എന്ഡിഎയ്ക്കും ബിജെപിക്കും മുതല്ക്കൂട്ടാകും. നദ്ദയുടെ ഇടപെടലുകളും തുടര് ചര്ച്ചകളും സംസ്ഥാന രാഷ്ട്രീയത്തിലെ ശാക്തിക ചേരികളില് മാറ്റം വരുത്തിയേക്കുമെന്ന പ്രതീക്ഷയാണ് ഉയരുന്നത്.
രണ്ട് ദിവസത്തെ കേരള സന്ദര്ശനത്തിലെ പ്രധാന അജണ്ട വിവിധ സാമൂഹ്യ-സാമുദായിക സംഘടനാ നേതാക്കളെ കാണുകയും ചര്ച്ച നടത്തുകയും ചെയ്യുക എന്നതാണ്. സാമുദായിക നേതാക്കളുമായി തൃശൂരിലും രാഷ്ട്രീയ നേതാക്കളുമായി തിരുവനന്തപുരത്തുമാണ് നദ്ദ കൂടിക്കാഴ്ച നടത്തുന്നത്. വിവിധ ക്രൈസ്തവ സഭകള്, എന്എസ്എസ്, എസ്എന്ഡിപി, മറ്റ് പിന്നാക്ക സമുദായ സംഘടനകള്, ധീവരസഭ പ്രതിനിധികള്, മുസ്ലിം സമൂഹത്തിലെ പുരോഗമന ചിന്തയുള്ള ചില വിഭാഗങ്ങള് എന്നിവരുടെ പ്രതിനിധികള് നദ്ദയുമായി ചര്ച്ച നടത്തിയേക്കും. തൃശൂര് കാസിനോ ഹോട്ടലിലാണ് കൂടിക്കാഴ്ച. എല്ലാവരേയും ക്ഷണിക്കുന്നുണ്ടെന്ന് ബിജെപി നേതൃത്വം അറിയിച്ചു.
ക്രൈസ്തവ സഭാ നേതൃത്വം ബിജെപിയോടടുക്കുന്നത് സംസ്ഥാനത്ത് രാഷ്ട്രീയ പരിവര്ത്തനത്തിന് വേഗം കൂട്ടുമെന്ന വിലയിരുത്തലാണുള്ളത്. ബിജെപിയോട് അകല്ച്ചയില്ലെന്ന് കര്ദ്ദിനാള് മാര് ജോര്ജ് ആലഞ്ചേരി തന്നെ വ്യക്തമാക്കിയിട്ടുണ്ടെന്നും ഏത് സമയത്തും ചര്ച്ചയ്ക്കും ആശയവിനിമയത്തിനും തങ്ങള് തയ്യാറാണെന്നും സീറോ മലബാര് സഭ വക്താക്കള് പറഞ്ഞു. യാക്കോബായ-ഓര്ത്തഡോക്സ് സഭാ നേതൃത്വങ്ങളും ബിജെപി അധ്യക്ഷനെ കാണും. സഭാ തര്ക്കം പരിഹരിക്കാന് ബിജെപി കേന്ദ്ര നേതൃത്വത്തിന്റെയും മിസോറം ഗവര്ണര് പി. എസ്. ശ്രീധരന് പിള്ളയുടേയും നേതൃത്വത്തില് ശ്രമങ്ങള് തുടരുന്ന സാഹചര്യത്തില് ദേശീയ അധ്യക്ഷനുമായുള്ള കൂടിക്കാഴ്ചയെ അതീവ പ്രാധാന്യത്തോടെയാണ് ഈ സഭകള് കാണുന്നത്.
ധീവരസഭ, പട്ടികജാതി-പട്ടികവര്ഗ്ഗ വിഭാഗങ്ങള് ഉള്പ്പെടെ പിന്നാക്ക സമുദായങ്ങള് സംസ്ഥാനത്ത് തുടര്ച്ചയായി അവഗണിക്കപ്പെടുന്നതില് കടുത്ത നിരാശയിലാണ്. കേരളത്തില് അധികാരത്തില് വന്ന മുന്നണികള് പിന്നാക്ക സമുദായങ്ങളെ അവഗണിച്ചുവെന്ന വികാരം ശക്തമാണ്. വിവിധ സാമൂഹ്യക്ഷേമ പദ്ധതികള്, വിദ്യാഭ്യാസ സ്കോളര്ഷിപ്പുകള് തുടങ്ങിയവയിലെല്ലാം നഗ്നമായ മത വിവേചനവും ന്യൂനപക്ഷ പ്രീണനവും നിലനില്ക്കുന്നുണ്ട്. പിന്നാക്ക വിഭാഗങ്ങളെ ബിജെപിയോടടുപ്പിക്കുന്നതിന് ഇത് വലിയ കാരണമാകും.
മുത്തലാക്ക് നിരോധനമുള്പ്പെടെയുള്ള കേന്ദ്ര സര്ക്കാരിന്റെ നിലപാടുകള് മുസ്ലിം സമൂഹത്തിലെ പുരോഗമന ചിന്താഗതിക്കാരെ ബിജെപിയോടടുപ്പിച്ചിട്ടുണ്ട്. പ്രത്യേകിച്ച് മുസ്ലീം സമുദായത്തിലെ വനിതകളെയും സ്ത്രീപക്ഷ സംഘടനകളേയും. വിവിധ മുസ്ലിം സംഘടനകളുടെ പ്രതിനിധികളേയും ചര്ച്ചയ്ക്കായി ക്ഷണിച്ചിട്ടുണ്ടെന്ന് ബിജെപി നേതൃത്വം അറിയിച്ചു. സംസ്ഥാനത്ത് എന്ഡിഎയുടെ പ്രവര്ത്തനം വിപുലപ്പെടുത്തുന്നതിനേക്കുറിച്ചും കൂടുതല് ഘടക കക്ഷികളെ സഹകരിപ്പിക്കുന്നതിനേക്കുറിച്ചുമുള്ള ചര്ച്ചകളാണ് നടക്കുക. നിയമസഭ തെരഞ്ഞെടുപ്പ് ഒരുക്കങ്ങളും ചര്ച്ചയാകും. മൂന്നിന് തിരുവനന്തപുരത്തും നാലിന് തൃശൂരിലുമാണ് നദ്ദയുടെ പരിപാടികള്.
ജന്മഭൂമി ഓണ്ലൈന്