തിരുവനന്തപുരം: നിയമസഭാ തെരഞ്ഞെടുപ്പ് പാര്ട്ടി ഐക്യത്തോടെയാണ് നേരിടുന്നത്. മുതിര്ന്ന നേതാക്കളെല്ലാം തെരഞ്ഞെടുപ്പില് മത്സരിക്കണമെന്നാണ് പാര്ട്ടി ആഗ്രഹിക്കുന്നത്. തെരഞ്ഞെടുപ്പില് മത്സരിക്കുന്നത് സംബന്ധിച്ച് പാര്ട്ടി നേതൃത്വം എന്താണ് പറയുന്നത അത് ചെയ്യുമെന്ന് ബിജെപി സംസ്ഥാന അധ്യക്ഷന് കെ. സുരേന്ദ്രന്.
നിയമസഭാ തെരഞ്ഞെടുപ്പില് മത്സരിക്കണോ വേണ്ടയോ എന്ന കാര്യം പാര്ട്ടി തീരുമാനിച്ചിട്ടില്ല. മത്സരിക്കാതെ പ്രചാരണം നടത്തണമെന്ന് പാര്ട്ടി പറഞ്ഞാല് അതായിരിക്കും ഏറ്റവും സന്തോഷമുള്ള കാര്യം. മത്സരിച്ചേ മതിയാകൂ എന്ന് പാര്ട്ടി പറഞ്ഞാല് മത്സരിക്കേണ്ടിവരുമെന്നും അദ്ദേഹം പറഞ്ഞു.
തെരഞ്ഞെടുപ്പ് തയ്യാറെടുപ്പുകള്, പ്രചാരണം എന്നിവയ്ക്കായി കുറച്ചുപേര് മാറിനില്ക്കേണ്ടതുണ്ട്. നിയമസഭാ തെരഞ്ഞെടുപ്പ് അടുക്കുന്നതോടെ പാര്ട്ടി പ്രവര്ത്തകരെല്ലാം പ്രചാരണങ്ങളില് സജീവമാകും. ഇതില് നിന്നും ആരും ഒഴിഞ്ഞുമാറി നില്ക്കില്ല. തെരഞ്ഞെടുപ്പ് സ്ഥാനാര്ത്ഥി പട്ടിക സംബന്ധിച്ച് പാര്ട്ടി കേന്ദ്ര നേതൃത്വം തീരുമാനിക്കുമെന്ന് സുരേന്ദ്രന് അറിയിച്ചു.
അതേസമയം തിരുവനന്തപുരം നേമം മണ്ഡലത്തില് മത്സരിക്കുന്നതിന് യുഡിഎഫിലെ പ്രമുഖ നേതാക്കള് തന്നെ മത്സരിക്കാന് തയ്യാറാകുന്നില്ല. നേമത്തിന്റെ പേര് കേട്ടപ്പോഴേ ഉമ്മന് ചാണ്ടി ഓടി. തിരുവനന്തപുരം മണ്ഡലം വിട്ട് നേമത്തേക്കില്ലെന്ന് ശിവകുമാറും പറഞ്ഞു. നേമം എന്ന് കേട്ടാല് ആരും വരില്ല.
ശബരിമല വിഷയം കത്തി നില്ക്കുമ്പോള് മാളത്തിലൊളിച്ചവരാണ് യുഡിഎഫ്. ഒരു സമരവും ചെയ്തിട്ടില്ല. അമ്പതിനായിരത്തോളം ബിജെപി ആര്എസ്എസ് പ്രവര്ത്തകരുടെ പേരിലാണ് കേസ്. ശബരിമലക്കാലത്ത് വിശ്വാസികള് നെഞ്ചുപൊട്ടി കരഞ്ഞപ്പോള് തിരിഞ്ഞുനോക്കാത്തവരാണ് യുഡിഎഫ്. ശബരിമലയെ സംബന്ധിച്ച് പ്രത്യേകിച്ച് പറയേണ്ടതില്ല. ജനങ്ങള്ക്കതെല്ലാം അറിയാമെന്നും സുരേന്ദ്രന് കൂട്ടിച്ചേര്ത്തു.
