തിരുവനന്തപുരം: അവകാശലംഘന പരാതിയില് മന്ത്രി തോമസ് ഐസക്കിന് ക്ലീന് ചിറ്റ് നല്കി നിയമസഭാ എത്തിക്സ് ആന്റ് പ്രിവിലേജ് കമ്മിറ്റി. തുടര് നടപടികള് അവസാനിപ്പിക്കാന് സമതി തീരുമാനിച്ചു. സിഎജി റിപ്പോര്ട്ട് നിയമസഭയില് വയ്ക്കും മുന്പ് വാര്ത്താ സമ്മേളനം വിളിച്ച് കിഫ്ബിക്കെതിരായ പരാമര്ശങ്ങള് പുറത്തുവിട്ടത് അവകാശലംഘനമാണെന്ന് ചൂണ്ടിക്കാട്ടി വി ഡി സതീശന് എംഎല്എയാണ് നോട്ടിസ് നല്കിയത്.
നിലവിലെ നിയമങ്ങളും ചട്ടങ്ങളും മറികടന്ന് റിപ്പോര്ട്ടില് കൂട്ടിച്ചേര്ക്കലുകള് നടത്തിയതാണ് പരാമര്ശങ്ങള് പുറത്തുവിടാനുള്ള അസാധാരണ സാഹചര്യം സൃഷ്ടിച്ചതെന്ന് സമിതി നിരീക്ഷിച്ചു. ചില പേജുകള് കൂട്ടിച്ചേര്ത്തതില് ദുരൂഹതയുണ്ടെന്ന മന്ത്രിയുടെ ആരോപണം നിയമസഭയില് സമര്പ്പിച്ച റിപ്പോര്ട്ടില് സമിതി ശരിവച്ചു.
സമതിയുടെ നടപടി തെറ്റായ കീഴ്വഴക്കിത്തിന് തുടക്കം കുറിക്കുമെന്ന പ്രതിപക്ഷാംഗങ്ങളുടെ വിയോജന കുറിപ്പോടെയാണ് റിപ്പോര്ട്ട് നിയമസഭയിലെത്തിയത്. എംഎല്എമാരായ വി എസ് ശിവകുമാര്, മോന്സ് ജോസഫ്, അനൂപ് ജേക്കബ് എന്നിവരാണ് വിയോജനക്കുറിപ്പ് എഴുതിയത്.
