തിരുവനന്തപുരം: വിമാനത്താവളം അദാനിയ്ക്ക് കൈമാറുന്നതിനെതിരെ പണ്ട് എസ്എഫ്ഐ നേതാവ് ജെയ്ക് വി. തോമസ് നടത്തിയ പ്രസംഗം ഒരിക്കല് കൂടി സോഷ്യല്മീഡിയയില് ചര്ച്ചയാക്കി കോണ്ഗ്രസ് നേതാവ് ടി. സിദ്ദിഖ്.
ചൊവ്വാഴ്ച അദാനിക്ക് വിമാനത്താവളം കൈമാറിക്കൊണ്ടുള്ള ഉത്തരവിറങ്ങിയപ്പോഴാണ് ഫേസ് ബുക്കില് ജെയ്ക് വി. തോമസിന്റെ പഴയ പ്രസംഗത്തിന്റെ വീഡിയോ സഹിതം ടി. സിദ്ദിഖ് ഷെയര് ചെയ്തത്. ‘വിമാനത്താവളം വില്ക്കുന്നെങ്കില് പറഞ്ഞോ, എത്രയാ വിമാനത്താവളത്തിന്റെ വില? ഞങ്ങള് വാങ്ങിക്കോളാം എന്ന് മുഖ്യമന്ത്രി പിണറായി വിജയന് ചോദിച്ചു’ എന്നാണ് ജെയ്ക് അന്ന് പ്രസംഗത്തില് പറഞ്ഞത്. അന്ന് വിമാനത്താവളം അദാനിക്ക് കൊടുക്കുന്നതിനെതിരെ അരയും തലയും മുറുക്കിയാണ് സിപിഎമ്മും ഡിവൈഎഫ്ഐയും എസ് എഫ് ഐയും രംഗത്തിറങ്ങിയത്. അന്നാണ് ജെയ്ക് അദാനിക്കെതിരായി പ്രസംഗിച്ചത്.
തിരുവനന്തപുരം വിമാനത്താവളം അദാനിക്ക് നല്കിയതായ വാര്ത്ത വന്നപ്പോള് സിദ്ദിഖ് സോഷ്ല് മീഡിയയില് പ്രതികരിച്ചതിങ്ങിനെ: അങ്ങിനെ വരാന് വഴിയില്ലല്ലോ…പിണറായി വെല പറഞ്ഞ് വച്ചതാണല്ലോ…’. സിദ്ദിഖിന്റെ ഈ പരിഹാസം സോഷ്യല് മീഡിയയില് വൈറലായി.
തിരുവനന്തപുരം വിമാനത്താവള നടത്തിപ്പ് അദാനിക്ക് നല്കിക്കൊണ്ട് ചൊവ്വാഴ്ചയാണ് അറിയിപ്പ് വന്നത്. എയര്പോര്ട്ട് അതോറിറ്റിയും അദാനിയും ഇത് സംബന്ധിച്ച കരാറില് ഒപ്പുവെച്ചു. 50 വര്ഷത്തേക്കാണ് കരാര്.
