ചെന്നൈ: തമിഴ്നാട്ടില് മകരപ്പൊങ്കല് ആഘോഷങ്ങളില് പങ്കെടുത്ത് ആര്എസ്എസ് സര്സംഘചാലക് മോഹന് ഭാഗവത്. പൊന്നിയമ്മന്മേട് ശ്രീ കടുംമ്പാടി ചിന്നമ്മന് ക്ഷേത്രത്തില് നടന്ന പൊങ്കല് ആഘോഷളിലാണ് അദ്ദേഹം ഭാഗമായത്. ആഘോഷങ്ങള്ക്ക് മുന്നോടിയായി അദ്ദേഹം ഗോമാതാ പൂജയിലും പങ്കെടുത്തു.
ശൈത്യകാലം അവസാനിച്ച് കൊയ്ത്തുകാലം ആരംഭിക്കുന്നതിന്റെ ആഘോഷമാണ് തമിഴ്നാട്ടില് പൊങ്കല്. ആഘോഷങ്ങളില് പങ്കെടുക്കാനായതില് അതീവ സന്തോഷമുണ്ടെന്നും മൂന്ന് ദിവസം പൊങ്കല് കൊണ്ടാടുന്ന സംസ്ഥാനം തമിഴ്നാട് മാത്രമാണെന്നും മോഹന് ഭാഗവത് അറിയിച്ചു.
രണ്ട് ദിവസത്തെ സന്ദര്ശനത്തിനായാണ് മോഹന്ഭാഗവത് തമിഴ്നാട്ടില് എത്തിയിരിക്കുന്നത്. യുവ പ്രൊഫഷണലുകളുമായും സ്റ്റാര്ട്ടപ്പ് ഉടമസ്ഥരുമായും മോഹന്ഭാഗവത് കൂടിക്കാഴ്ച നടത്തുന്നുണ്ട്. ഇതോടൊപ്പം സംസ്ഥാനത്തെ ആര്എസ്എസ് നേതൃത്വവുമായും അദ്ദേഹം ചര്ച്ച നടത്തും.
തുഗ്ലക് മാഗസീന് സംഘടിപ്പിക്കുന്ന സ്വകാര്യ ചടങ്ങില് പങ്കെടുക്കുന്നതിനായി കേന്ദ്ര ആഭ്യന്തരമന്ത്രി അമിത്ഷാ ഇന്ന് ചെന്നൈയില് എത്തുമെന്ന് നേരത്തെ റിപ്പോര്ട്ടുകള് വന്നെങ്കിലും കേന്ദ്ര ആഭ്യന്തര മന്ത്രാലയം ഇതുസംബന്ധിച്ചുള്ള റിപ്പോര്ട്ടുകളൊന്നും പുറത്തുവിട്ടിട്ടില്ല. അതേസമയം ബിജെപി ദേശീയ പ്രസിഡന്റ് ജെ.പി. നദ്ദ ഇന്ന് തമിഴ്നാട് സന്ദര്ശിക്കുന്നുണ്ട്. ബിജെപി സംസ്ഥാന നേതൃത്വം സംഘടിപ്പിക്കുന്ന ‘നമ്മ ഊര് പൊങ്കല്’ എന്ന പരിപാടിയില് പങ്കെടുക്കുന്നതിനായാണ് എത്തുന്നത്. ഇതോടൊപ്പം തുഗ്ളക് മാഗസീനിന്റെ 51ാം വാര്ഷിക പരിപാടിയില് പങ്കെടുക്കുമെന്നും അറിയിച്ചിട്ടുണ്ട്. വയനാട് എംപി രാഹുല് ഗാന്ധിയും ജെല്ലിക്കെട്ട് കാണാന് ഇന്ന് തമിഴ്നാട്ടില് എത്തുന്നുണ്ട്.
