വാസ്കോ: ഐഎസ്എല് ഏഴാം സീസണില് മുന് ചാമ്പ്യന്മാരായ ബെംഗളൂരു എഫ്സിയെ നോര്ത്ത് ഈസ്റ്റ് യുണൈറ്റഡ് സമനിലയില് തളച്ചു. ഇരു ടീമുകളും ഓരോ ഗോള് വീതം നേടി. ഈ സമനിലയോടെ പതിനൊന്ന് മത്സരങ്ങളില് 13 പോയിന്റുമായി ബെംഗളൂരു ആറാം സ്ഥാനത്താണ്. നോര്ത്ത് ഈസ്റ്റ് പതിനൊന്ന് മത്സരങ്ങളില് 12 പോയിന്റുമായി ഏഴാം സ്ഥാനത്തും.
കളിയുടെ ഇരുപത്തിയേഴാം മിനിറ്റില് നോര്ത്ത് ഈസ്റ്റ് ലീഡ് നേടി. ലൂയിസ് മച്ചാഡോയാണ് ഗോള് നേടിയത്. ഫെഡ്രിക്കോ നല്കിയ പാസ് മച്ചാഡോ വലയിലേക്ക് തിരിച്ചുവിടുകയായിരുന്നു. രണ്ടാം പകുതിയുടെ തുടക്കത്തില് ബെംഗളൂരു എഫ്സി ഗോള് മടക്കി. ഡിമാസ് ഡെല്ഗാഡോയുടെ പാസ് മുതലാക്കി രാഹുല് ഭേക്കേയാണ് ഗോള് നേടിയത്.
