കൊല്ലം: മുതുകില്‍ മുറിവേറ്റ് പുഴുവരിച്ച നിലയില്‍ ഉപേക്ഷിക്കപ്പെട്ട പട്ടിക്കുഞ്ഞിന് പുതുജീവന്‍. പുന്തലത്താഴം സ്വദേശി ഗിരികൃഷ്ണനാണ് പട്ടിക്കുഞ്ഞിനെ കണ്ടെത്തിയത്. കഴിഞ്ഞ ദിവസം രാവിലെ ബാഡ്മിന്റന്‍ കളിക്കാനായി കടപ്പാക്കട സ്‌പോര്‍ട്‌സ് ക്ലബ്ബില്‍ എത്തിയതാണ് ഗിരി.
ഏതോ പട്ടിയുടെ നിര്‍ത്താതെയുള്ള കരച്ചില്‍ കേട്ടാണ് ഉറവിടം അന്വേഷിച്ചത്. ശ്രദ്ധിച്ചുനോക്കിയപ്പോള്‍ തളര്‍ന്നുകിടക്കുന്ന ഒരു പട്ടിക്കുഞ്ഞിനെയാണ് കണ്ടത്. പരിശോധിച്ചതില്‍ നിന്ന് ആരോ ഉപേക്ഷിച്ചതാണെന്ന് ബോധ്യപ്പെട്ടു. മറ്റേതോ മൃഗത്തിന്റെ കടിയേറ്റ് മുതുകിലെ മാംസം നഷ്ടപ്പെട്ടാണ് വ്രണമായതും പുഴുവരിച്ചതും. പട്ടിക്കുഞ്ഞിനെ അവിടെ ഉപേക്ഷിച്ചിട്ട് പോകാതെ സുഹൃത്തുക്കളായ സൈമണ്‍ സാബുവും, ലാലുവുമായി ചേര്‍ന്ന് പട്ടിക്കുഞ്ഞിനെ കാര്‍ഡ്‌ബോര്‍ഡ് പെട്ടിയിലാക്കി.
ഒട്ടുംവൈകാതെ തേവള്ളിയിലെ മൃഗാശുപത്രിയിലെത്തിച്ചു ചികിത്സ നല്‍കി. ഓരോ ജീവികള്‍ക്കും ആരോഗ്യത്തോടെ ജീവിക്കാന്‍ ഈ ഭൂമിയില്‍ അവകാശമുണ്ടെന്ന ചിന്തയാണ് പട്ടിക്കുഞ്ഞിനെ രക്ഷിക്കാന്‍ പ്രചോദനമായതെന്ന് ഗിരി പറഞ്ഞു. ട്രാക്ക് അംഗം കൂടിയാണിദ്ദേഹം.
