വില്യംസണിന് തുടര്‍ച്ചയായ മൂന്നാം സെഞ്ചുറി

വെല്ലിങ്ടണ്‍: ക്യാപ്റ്റന്‍ കെയ്ന്‍ വില്യംസണിന്റെ സെഞ്ചുറിയുടെ മികവില്‍ ന്യൂസിലന്‍ഡ് പാക്കിസ്ഥാനെതിരായ രണ്ടാം ടെസ്റ്റില്‍ ഒന്നാം ഇന്നിങ്‌സ് ലീഡിലേക്ക്. പാക്കിസ്ഥാന്റെ 297 റണ്‍സിന് മറുപടി പറയുന്ന ന്യൂസിലന്‍ഡ് രണ്ടാം നാള്‍ കളി നിര്‍ത്തുമ്പോള്‍ മൂന്ന് വിക്കറ്റിന് 286 റണ്‍സ് എടുത്തു.  

വില്യംസണ്‍  112 റണ്‍സുമായി കീഴടങ്ങാതെ നില്‍ക്കുകയാണ്. വില്യംസണിന്റെ തുടര്‍ച്ചയായ മൂന്നാം സെഞ്ചുറിയാണിത്. നേരത്തെ വിന്‍ഡീസിനെതിരായ ആദ്യ ടെസ്റ്റിലും (129) പാക്കിസ്ഥാനെതിരായ ആദ്യ ടെസ്റ്റിലും (112) വില്യംസണ്‍ സെഞ്ചുറി നേടിയിരുന്നു.

വില്യംസണിനൊപ്പം ഹെന്റി നിക്കോള്‍സും (89) പുറത്താകാതെ നില്‍ക്കുകയാണ്. വേര്‍പരിയാത്ത നാലാം വിക്കറ്റില്‍ ഇവര്‍ 215 റണ്‍സ് നേടിയിട്ടുണ്ട്. 175 പന്തുകള്‍ നേരിട്ട വില്യംസണ്‍ പതിനാറ് ബൗണ്ടറികളുടെ പിന്‍ബലത്തിലാണ് 112 റണ്‍സുമായി പുറത്താകാതെ നില്‍ക്കുന്നത്. 186 പന്ത് നേരിട്ട നിക്കോള്‍സ് എട്ട് ബൗണ്ടറിയടിച്ചു.  

ടോം ലാത്തം (33), ടോം ബ്ലന്‍ഡല്‍ (16), റോസ് ടെയ്‌ലന്‍ (12) എന്നിവരാണ് പുറത്തായത്.