വാഷിംഗ്ടൺ ഡിസി : നിയുക്ത പ്രസിഡന്റ് ജൊ ബൈഡൻ വൈറ്റ് ഹൗസ് എക്കണോമിക് പോളിസി ടീമിനെ പ്രഖ്യാപിച്ചു. ഡിസംബർ 21 ന് പ്രഖ്യാപിച്ച ടീമിൽ ഇന്ത്യൻ അമേരിക്കൻ അറ്റോർണി ഭരത് രാമമൂത്തിയെ നാഷണൽ ഇക്കണോമിക് കൗൺസിൽ ഡെപ്യൂട്ടി ഡയറക്ടറായി നിയമിച്ചിട്ടുണ്ട്. റൂസ്വെൽട്ട് ഇൻസ്റ്റിറ്റ്യൂട്ട് പവർ പ്രോഗ്രാം മാനേജിംഗ് ഡയറക്ടറായാണ് രാമമൂർത്തി ഇപ്പോൾ പ്രവർത്തിക്കുന്നത്. സെനറ്റർ എലിസബത്ത് വാറന്റെ മുൻ എയ്‍ഡ് കൂടിയായിരുന്നു രാമ മൂർത്തി.
തമിഴ്നാട്ടിൽ നിന്ന് അമേരിക്കയിലേക്ക് കുടിയേറിയ രവി രാമമൂർത്തിയുടെ മകനാണ് ഭരത് രാമമൂർത്തി. രവി രാമമൂർത്തി ഹാർവാർഡ് യൂണിവേഴ്സിറ്റിയിൽ നിന്നും ഡോക്ടറേറ്റ് നേടിയ വ്യക്തിയാണ്. ഹാർവാർഡ് യൂണിവേഴ്സിറ്റി, യെൽ യൂണിവേഴ്സിറ്റി തുടങ്ങിയ പ്രമുഖ യൂണിവേഴ്സിറ്റികളിലാണ് ഭരത് രാമ മൂർത്തി പഠനം പൂർത്തീകരിച്ചത്. നിയമപഠനം പൂർത്തിയാക്കിയശേഷം ബോസ്റ്റൺ റെഡ് സോക്സ് ലീഗൽ ഡിപ്പാർട്ട്മെന്റിലാണ് ആദ്യമായി ഔദ്യോഗീക ജീവിതം ആരംഭിച്ചത്.
ഭരത് രാമമൂർത്തിയുടെ നിയമനത്തോടെ ബൈഡൻ ടീമിൽ ഇന്ത്യൻ വംശജരുടെ എണ്ണം 25ന് മുകളിലായി. വൈസ് പ്രസിഡന്റായി തിരഞ്ഞെടുക്കപ്പെട്ട ഇന്ത്യൻ വംശജ കമല ഹാരിസിന്റെ സ്വാധീനം ഈ നിയമനങ്ങളിൽ നിഴലിച്ചു കാണുന്നുണ്ട്.
ജന്മഭൂമി ഓണ്‍ലൈന്‍