കൊല്ലം: എസ്എന്‍ഡിപി സംരക്ഷണസമിതി ഭാരവാഹികള്‍ കൊല്ലം എസ്എന്‍ഡിപി യോഗം ഓഫീസിനു മുന്നില്‍ ഉപവാസ സമരം സംഘടിപ്പിച്ചു. എസ്എന്‍ഡിപി യോഗത്തില്‍ ശ്രീനാരായണധര്‍മവും ജനാധിപത്യവും പുനഃസ്ഥാപിക്കുക, എസ്എന്‍ഡിപി യോഗത്തില്‍ നടന്ന അഴിമതിയും കൊള്ളയും സമഗ്രമായി അന്വേഷിക്കുക എന്നീ ആവശ്യങ്ങള്‍ ഉന്നയിച്ചായിരുന്നു ഉപവാസം.
ധര്‍മസമരത്തിലൂടെ ശ്രീനാരായണപ്രസ്ഥാനത്തെ ഇന്നത്തെ കൊള്ളസംഘത്തില്‍ നിന്ന് മോചിപ്പിക്കുവാന്‍ ശ്രീനാരായണീയര്‍ മുന്നോട്ടുവരേണ്ട സമയം അതിക്രമിച്ചിരിക്കുന്നു എന്ന് സമരം ഉദ്ഘാടനം ചെയ്തു കൊണ്ട് എം.കെ. സാനു പറഞ്ഞു. എസ്എന്‍ഡിപി യോഗത്തിലെ തെരഞ്ഞെടുപ്പിന് വ്യാജ വോട്ടര്‍ പട്ടിക തയ്യാറാക്കുന്നതിനെതിരെ പ്രതിഷേധിക്കാന്‍ ശ്രീനാരായണീയര്‍ തയ്യാറാകുമെന്നും അദ്ദേഹം പറഞ്ഞു.
എസ്എന്‍ഡിപി സംരക്ഷണസമിതി സംസ്ഥാന പ്രസിഡന്റ് അഡ്വ. എസ്. ചന്ദ്രസേനന്‍ അദ്ധ്യക്ഷത വഹിച്ചു. കൊല്ലം ജില്ലാപ്രസിഡന്റ് ഡോ. ബി.ആര്‍. പ്രസാദ്, ജനറല്‍ സെക്രട്ടറിമാരായ അഡ്വ. ആര്‍. അജന്ത കുമാര്‍, മധു പരുമല, വൈസ് പ്രസിഡന്റ് പി.എസ്. രാജീവ്, പി.കെ. പ്രകാശ്, ചന്ദ്രബോസ്, വി.പി. ദാസന്‍, ശ്രീപാദം ശ്രീകുമാര്‍, സി.എസ്. ഋഷി, അജയന്‍ തങ്കപ്പന്‍, ഗിരിജ, സലിം കുമാര്‍, അരുണ്‍കുമാര്‍, കുഞ്ഞുമോള്‍ എന്നിവര്‍ സംസാരിച്ചു.
