കോഴിക്കോട്: താമരയ്ക്ക് വോട്ട് തേടിയുള്ള പ്രചാരണത്തിലാണ് സ്ഥാനാര്ത്ഥികളായ അച്ഛനും മകനും. കുരുവട്ടൂര് പഞ്ചായത്തിലെ ചെറുവറ്റ പീടികമീത്തല് വീട്ടില് സുരേഷും മകന് പി.എം. അര്ജുനുമാണ് എന്ഡിഎ സ്ഥാനാര്ത്ഥികളായി ജനവിധി തേടുന്നത്.
കുന്ദമംഗലം ബ്ലോക്ക് പഞ്ചായത്ത് പോലൂര് ഡിവിഷനിലെ സ്ഥാനാര്ത്ഥിയാണ് സുരേഷ്. മകന് അര്ജുന് കുരുവട്ടൂര് ഗ്രാമപഞ്ചായത്ത് 12-ാം വാര്ഡ് ചെറുവറ്റയിലെ സ്ഥാനാര്ത്ഥിയാണ്. സുരേഷ് മത്സരിക്കുന്ന ഡിവിഷനിലെ 10 വാര്ഡുകളിലൊന്നാണ് ചെറുവറ്റ. അതുകൊണ്ട് അച്ഛനും മകനും ഒന്നിച്ചാണ് വോട്ടു തേടി ഇറങ്ങുന്നത്. ബിജെപി കോഴിക്കോട് ജില്ലാ സമിതി അംഗമാണ് എലത്തൂര് മണ്ഡലം മുന് ജനറല് സെക്രട്ടറി കൂടിയായ സുരേഷ്. സുരേഷും ഭാര്യ ബിന്ദുവും നേരത്തെ ഈ വാര്ഡില് നിന്ന് ബിജെപി സ്ഥാനാര്ത്ഥികളായി മത്സരിച്ചിട്ടുണ്ട്.
23 കാരനായ അര്ജുന്റെ കന്നിയങ്കമാണിത്. യുവമോര്ച്ച പഞ്ചായത്ത് കമ്മറ്റി സെക്രട്ടറിയായ അര്ജുന് സ്വകാര്യ സ്ഥാപനത്തിലെ ജീവനക്കാരന് കൂടിയാണ്. സഹോദരി അമൃത, അര്ജുനും അച്ഛനും പിന്തുണയുമായി ഒപ്പമുണ്ട്.
