തിരുവനന്തപുരം: ഇനി ഓര്ഡിനന്സിലൂടെ നിയമം കൊണ്ടുവരില്ലെന്നും നിയമസഭയില് ചര്ച്ച ചെയ്തശേഷം മാത്രമേ നടപടി സ്വീകരിക്കൂവെന്നും മുഖ്യമന്ത്രി പിണറായി വിജയന്. കേരള പൊലീസ് ആക്ടില് 118എ എന്ന വകുപ്പ് കൂട്ടിച്ചേര്ത്തുകൊണ്ട് പുറപ്പെടുവിച്ച ഓര്ഡിനന്സ് പിന്വലിക്കുന്നതിന് ഗവര്ണറെ കണ്ട് ശുപാര്ശ ചെയ്യാന് തീരുമാനിച്ചുവെന്നും അദേഹം പറഞ്ഞു. 2020ലെ കേരള പൊലീസ് (ഭേദഗതി) പിന്വലിക്കല് ഓര്ഡിനന്സ് എന്ന പേരിലാണ് പുതിയ ഓര്ഡിനന്സ് ഇറക്കുകയെന്ന് മുഖ്യമന്ത്രി പിണറായി വിജയന് വാര്ത്താസമ്മേളനത്തില് വ്യക്തമാക്കി.
സമൂഹമാധ്യമങ്ങളിലൂടെ അപകീര്ത്തികരവും വിദ്വേഷകരവുമായ ഉള്ളടക്കവും വ്യാജവാര്ത്തകളും പ്രചരിപ്പിക്കുന്നത് തടയുന്നതിനാണ് പൊലീസ് ആക്ടില് ഭേദഗതി വരുത്തിയിരുന്നത്. സ്ത്രീത്വത്തെ അപമാനിക്കുന്ന പ്രചാരണം വലിയ തോതില് വര്ധിക്കുകയും സമൂഹത്തില് വലിയ പ്രതിഷേധം ഉയരുകയും ചെയ്ത സാഹചര്യത്തിലായിരുന്നു നിയമ ഭേദഗതി. എന്നാല് സമൂഹത്തിലെ വിവിധ വിഭാഗങ്ങളില് നിന്ന് ഈ നിയമഭേദഗതിയെ കുറിച്ച് പ്രതിഷേധം ഉയര്ന്നു. ഇതേ തുടര്ന്നാണ് പിന്വലിക്കുന്നതെന്ന് അദേഹം പറഞ്ഞു.
