തഞ്ചാവൂരില് നിന്ന് ഏകദേശം അഞ്ചു പതിറ്റാണ്ടുകള്ക്കു മുമ്പ് ശില്പകലയുടെ കരവിരുതുമായി കേരളത്തില് എത്തിയതാണ് തട്ടാവിള കുടുംബം. തട്ടാവിളയിലെ അയ്യപ്പപണിക്കരാണ് ശബരിമലയില് ശ്രീധര്മശാസ്താവിന്റെ വിഗ്രഹ ശില്പി.
ചെങ്ങന്നൂര് മഹാദേവ ക്ഷേത്രത്തിന്റെ പുനര്നിര്മാണത്തിനായി അന്നു നാടുവാഴിയായിരുന്ന വഞ്ഞിപ്പുഴ തമ്പുരാന് തിരുവിതാംകൂര് രാജാവിന്റെ
നിര്ദേശപ്രകാരമാണ് തഞ്ചാവൂരില് നിന്നും തട്ടാവിള കുടുംബത്തെ ചെങ്ങന്നൂരിലേക്ക് കൊണ്ടുവന്നത്.
തട്ടാവിള കുടുംബത്തിന്റെ ശില്പകലാ വൈഭവം മനസ്സിലാക്കിയ രാജാവ് ക്ഷേത്രനിര്മാണം പൂര്ത്തിയായതോടെ ചെങ്ങന്നൂരില് യഥേഷ്ടം സ്ഥലവും നിലവും പതിച്ചു നല്കുകയായിരുന്നു.
അങ്ങനെ തട്ടാവിള കുടുംബം ചെങ്ങന്നൂരിന് സ്വന്തമായി. ദേവന് ആലയം പണിത പൂര്വികരുടെ പുണ്യം പോലെയാണ് കുടുംബത്തില് പ്രശസ്ത ശില്പികളായ നീലകണ്ഠപണിക്കരും സഹോദരന് അയ്യപ്പ പണിക്കരും ജനിച്ചത്.
പഴയ അയ്യപ്പ വിഗ്രഹത്തിന് ഭംഗം വന്നതോടെ പുതിയ വിഗ്രഹം പഞ്ചലോഹത്തില് നിര്മിക്കാന് ബന്ധപ്പെട്ടവര് തീരുമാനിച്ചു. അതിനുള്ള അസുലഭ അവസരം നീലകണ്ഠപണിക്കര്ക്കും അയ്യപ്പപണിക്കര്ക്കുമായിരുന്നു.
ചെങ്ങന്നൂര് മഹാദേവ ക്ഷേത്രത്തിന്റെ കിഴക്കേ ഗോപുര മുകളിലത്തെ നിലയില് വച്ച് ഇരുവരും വിഗ്രഹനിര്മാണം തുടങ്ങി. മെഴുകില് രൂപം നിര്മിച്ച് കരുവാക്കിയ ശേഷം ഊട്ടുപുരയില് വച്ചാണ് വാര്ത്തത്. ഇതിനായി വേണ്ടിവന്ന രണ്ടുമാസമത്രയും വ്രതശുദ്ധിയോടെ അയ്യപ്പപ്പണിക്കര് ക്ഷേത്രത്തില് തന്നെയാണ് താമസിച്ചിരുന്നത്. ശില്പികള്ക്കൊപ്പം കുടുംബത്തിലെ സ്ത്രീകളും കഠിനവ്രതാനുഷ്ഠാനം നടത്തിയിരുന്നു. ഓരോ ശില്പ നിര്മിതിയിലും ഈ വ്രതാനുഷ്ഠാനങ്ങള് തട്ടാവിള കുടുംബം ഇന്നും പിന്തുടരുന്നു.
