തിരുവനന്തപുരം: സ്വര്ണക്കടത്ത് കേസില് റിമാന്ഡില് കഴിയുന്ന സ്വപ്ന സുരേഷിന്റേതെന്ന പേരില് മുഖ്യമന്ത്രി പിണറായി വിജയനെ സംരക്ഷിക്കുന്ന തരത്തിലുള്ള ശബ്ദരേഖ പുറത്തു വന്നതില് അടിമുടി ദുരൂഹത. അന്വേഷണം മുഖ്യമന്ത്രിയുടെ ഓഫിസിലേക്ക് നീളുന്നതിനിടെയാണ് തിരുവനന്തപുരം അട്ടക്കുളങ്ങര ജയിലില് കഴിയുന്ന ഒരു പ്രതി ഇത്തരത്തില് ശബ്ദം റെക്കോര്ഡ് ചെയ്യുന്നതും അതു മാധ്യമങ്ങള്ക്ക് നല്കുന്നതും. ബിജെപി സംസ്ഥാന പ്രസിഡന്റ് കെ. സുരേന്ദ്രന് ആരോപിച്ചിരുന്നു. ഇതു സത്യമെന്ന് തെളിയുന്നതാണ് സംഭവവികാസങ്ങള്. മുഖ്യമന്ത്രിയുമായി അടുത്ത ബന്ധമുള്ള ഒരു ഉന്നതന് സ്വപ്നയെ ജയിലില് സന്ദര്ശിച്ചതായി റിപ്പോര്ട്ടുണ്ട്. അപ്പോഴായിരിക്കാം ശബ്ദസന്ദേശം റെക്കോര്ഡ് ചെയ്ത് നല്കിയതെന്നാണ് സൂചന. ആദ്യഘട്ടത്തില് സുരേന്ദ്രന്റെ ആരോപണം അടിസ്ഥാനരഹിതമാണെന്ന് ജയില് ഡിജിപി ഋഷിരാജ് സിങ്ങ് വ്യക്തമാക്കുകയും ചെയ്തിരുന്നു. ഇതിനു പിന്നാലെയാണ് സ്വപ്നയുടേതെന്ന പേരില് ശബ്ദസന്ദേശം പുറത്തുവന്നത്. ഇതോടെ ജയില് വകുപ്പ് പ്രതിക്കൂട്ടിലായി.
ഇതോടെ, സ്വര്ണക്കടത്ത് കേസില് ജയിലില് കഴിയുന്ന സ്വപ്ന സുരേഷിന്റേതെന്ന പേരില് ശബ്ദ സന്ദേശം പുറത്തുവന്നതില് അന്വേഷണം പ്രഖ്യാപിച്ചു. ജയില് ഡിജിപി ഋഷിരാജ് സിങാണ് അന്വേഷണത്തിന് ഉത്തരവിട്ടത്. ഇന്നു തന്നെ അന്വേഷിച്ച് റിപ്പോര്ട്ട് നല്കാന് ഡിജിപി ദക്ഷിണമേഖല ഡിഐജിയോട് നിര്ദേശിച്ചിട്ടുണ്ട്.
മുഖ്യമന്ത്രിയുടെ പേര് പറയാന് അന്വേഷണ സംഘത്തില് ചിലര് തന്നെ നിര്ബന്ധിച്ചതായി ശബ്ദസന്ദേശത്തില് സ്വപ്ന സുരേഷ് പറയുന്നുണ്ട്. ഒരു വാര്ത്താ പോര്ട്ടലാണ് സ്വപ്ന സുരേഷിന്റേതെന്ന പേരില് ശബ്ദസന്ദേശം പുറത്തുവിട്ടത്. മുഖ്യമന്ത്രിയ്ക്കെതിരെ മൊഴി നല്കിയാല് മാപ്പുസാക്ഷിയാക്കാമെന്ന് അന്വേഷണ ഏജന്സി പറഞ്ഞതായാണ് സ്വപ്ന ശബ്ദസന്ദേശത്തില് പറയുന്നത്.
തന്റേതായി രേഖപ്പെടുത്തിയ മൊഴി വായിക്കാന് അനുവദിക്കാതെയാണ് ഒപ്പിടുവിച്ചതെന്നും സ്വപ്ന ആരോപിക്കുന്നു. ശിവശങ്കറിനൊപ്പം യുഎഇയില് പോയി മുഖ്യമന്ത്രിക്കുവേണ്ടി ചര്ച്ചകള് നടത്തിയതായാണ് കോടതിയില് സമര്പ്പിച്ച മൊഴിയിലുള്ളതെന്നും അത് ഏറ്റുപറഞ്ഞാല് മാപ്പുസാക്ഷിയാക്കാമെന്നുമാണ് അന്വേഷണ ഏജന്സി പറയുന്നതെന്നും ശബ്ദസന്ദേശത്തില് പറയുന്നുണ്ട്. ശബ്ദസന്ദേശം അടിമുടി പിണറായിയെ സംരക്ഷിക്കുന്ന തരത്തിലാണ്. മറ്റൊരു കാര്യവും സന്ദേശത്തിലില്ല.
