കൊച്ചി: പാലാരിവട്ടം പാലം അഴിമതിക്കേസില് മുന് പൊതുമരാമത്ത് വകുപ്പ് മന്ത്രി വി.കെ. ഇബ്രാഹിം കുഞ്ഞിനെ ചോദ്യം ചെയ്യാന് വിജിലന്സ് സംഘം വീട്ടിലെത്തി. കേസില് നിര്ണായക നീക്കമാണ് വിജിലന്സ് നടത്തിയിരിക്കുന്നത്. മുന് മന്ത്രിയെ കസ്റ്റഡിയില് എടുത്ത് ചോദ്യം ചെയ്യുന്നതിനായാണ് വിജിലന്സ് വീട്ടില് എത്തിയിരിക്കുന്നത്.
അതേസമയം ഇബ്രാഹിം കുഞ്ഞ് ഇപ്പോള് വീട്ടില് ഇല്ലെന്നും ആശുപത്രിയില് ചികിത്സയിലാണെന്നാണ് അദ്ദേഹത്തിന്റ ഭാര്യ വിജിലന്സ് സംഘത്തെ അറിയിച്ചത്. ചികിത്സയ്ക്കായി കഴിഞ്ഞ ദിവസം വൈകീട്ടോടെ ആശുപത്രിയിലേക്ക് പോയെന്നാണ് വീട്ടുകാര് പറയുന്നത്. എന്നാല് ഇബ്രാഹിം കുഞ്ഞ് വീട്ടിലുണ്ടെന്ന വിവരത്തെ തുടര്ന്നാണ് സംഘം വീട്ടിലെത്തിയത്. വീടും പരിസരവും വിജിലന്സ് തെരച്ചില് നടത്തി.
അറസ്റ്റിനെ മുന്നില് കണ്ട് ആശുപത്രിയിലേക്ക് മാറിയതാണോയെന്നും സംശയിക്കുന്നുണ്ട്. ഇബ്രാഹിംകുഞ്ഞ് ചികിത്സലുണ്ടെന്ന് കൊച്ചി ലേക്ഷോര് ആശുപത്രി അധികൃതര് സ്ഥിരീകരിച്ചിട്ടുണ്ട്.
വീട്ടില് പരിശോധന നടത്തിയതിന് പിന്നാലെ അന്വേഷണ ഉദ്യോഗസ്ഥരില് ഒരു സംഘം പിന്നീട് ഇബ്രാഹിംകുഞ്ഞിനെ പ്രവേശിപ്പിച്ച ആശുപത്രിയിലേക്ക് പോയെന്നും സൂചനയുണ്ട്. മറ്റൊരു സംഘം വീട്ടില് തുടരുകയാണ്. ഇബ്രാഹിംകുഞ്ഞിന്റെ അറസ്റ്റിലേക്കാണ് വിജിലന്സ് നീങ്ങുന്നതെന്നാണ് ലഭിക്കുന്ന സൂചന.
പാലാരിവട്ടം പാലം അഴിമതിക്കേസിന്റെ അന്വേഷണം വേഗത്തിലാക്കാന് നിര്ദ്ദേശം ലഭിച്ചതിനെ തുടര്ന്നാണ് വിജിലന്സ് സംഘം ഇബ്രാഹിം കുഞ്ഞിനെ വിശദമായി ചോദ്യം ചെയ്യാനെത്തിയത്. കേസില് ഇ ശ്രീധരനെ സാക്ഷിയാക്കും. പാലം പൊളിച്ച ശേഷമുള്ള അവസ്ഥ വിജിലന്സ് അദ്ദേഹത്തോട് നേരത്തെ തന്നെ ചോദിച്ചറിഞ്ഞിട്ടുണ്ട്. പാലം പൊളിച്ച സാങ്കേതിക വിദഗ്ധരോടും ഇതുമായി ബന്ധപ്പെട്ട വിവരങ്ങള് തേടി കഴിഞ്ഞു.
