നിര്മ്മാണത്തില് ഗൃഹത്തോടൊപ്പം തന്നെ പ്രാധാന്യമുള്ളവയാണ് ഉപാലയങ്ങളും. ഗൃഹ സംബന്ധിയായതോ, സമീപത്തുള്ളതോ ആയ ഉപാലയങ്ങള് സ്ഥാപിക്കുമ്പോള് അതിന്റെ സ്ഥാനത്തെക്കുറിച്ച് പ്രത്യേക നിബന്ധനകളുണ്ട്. അതില് പ്രധാനം ഉപാലയങ്ങള് ഉചിതമായ ദേവസ്ഥാനങ്ങളിലും, ഗൃഹത്തിന്റെ സൂത്രങ്ങള്ക്കു വേധമില്ലാത്ത രീതിയിലും ആകണമെന്നുള്ളതാണ്.
ഉപാലയങ്ങളില് പ്രധാനപ്പെട്ട ഒന്നാണ് തൊഴുത്ത്. കന്നുകാലി വളര്ത്തല് പണ്ടുമുതല്ക്കേ മനുഷ്യന്റെ സാമൂഹ്യ ജീവിതവുമായി ബന്ധപ്പെട്ടിരിക്കുന്നതാകയാല് അവയുടെ പരിപാലനത്തിലും സംരക്ഷണത്തിലും കൂടുതല് ശ്രദ്ധ നല്കിയിരുന്നു. അതുകൊണ്ടുതന്നെ വീടിനോട് ഒപ്പം പ്രാധാന്യം തൊഴുത്തിനും നല്കി പോന്നിരുന്നു. വലിയ ഉയരത്തിലുള്ള വൈക്കോല് തുറുകള് വീടുകള്ക്കുമുന്നില് ഒരു അഭിമാന സ്തംഭമായി കുറച്ചു നാളുകള്ക്ക് മുന്പ് വരെ സ്ഥാനം പിടിച്ചിരുന്നു. തൊഴുത്തിന്റെ ഉചിത സ്ഥാനങ്ങളെക്കുറിച്ച് വാസ്തു വിശദമായി പ്രതിപാദിച്ചിട്ടുണ്ട്.
‘ഗോശാലാ ഇന്ദ്രജലേശയോഃ’ എന്ന വാസ്തു പ്രമാണ പ്രകാരം പശുക്കള്ക്കുള്ള തൊഴുത്ത് കിഴക്കും പടിഞ്ഞാറും സ്ഥാനങ്ങളില് ശുഭകരമാണ്. വിശേഷിച്ച് വിതഥന്, പൂഷാവ് എന്നീ ദേവന്മാരുടെ പദങ്ങളില്. പര്ജന്യന്, ജയന്തന് എന്നീ ദേവന്മാരുടെയും (വടക്ക് കിഴക്ക്) പുഷ്പദന്തന്, ദ്വാരപാലന്, എന്നീ ദേവ പദങ്ങളിലും (വടക്ക് പടിഞ്ഞാറ്) വായുകോണിലും തൊഴുത്തിനു സ്ഥാനം നിശ്ചയിക്കാം. പോത്തിനും എരുമയ്ക്കും ഉള്ള തൊഴുത്ത് ഭ്രുംഗന്, ശോഷന്, യമന് എന്നീ ദേവന്മാരുടെ പദങ്ങളിലാണ് കൂടുതല് ശുഭകരം. കാളയ്ക്കും യമപദത്തില് ആവാം. ആടിന് കൂട് അഗ്നി-യമ പദങ്ങളുടെ മദ്ധ്യത്തിലോ ദ്വാരപാലന്, സുഗ്രീവന് എന്നീ ദേവപദങ്ങളിലൊ ആകാം. അന്തരീക്ഷ ദേവപദവും പൊതുവെ എല്ലാ മൃഗങ്ങള്ക്കും സ്വീകാര്യമാണ്.
വീട്ടില് നിലവിളക്ക് കത്തിച്ചു വെച്ചാല് അത് കാലികള് കാണുന്നതും യാത്രയ്ക്ക് പോകുമ്പോള് ഗോക്കളെ കണ്ടിറങ്ങുന്നതും ഐശ്വര്യമായതിനാല് അതിന്പ്രകാരം ഉള്ള സ്ഥാനങ്ങള് മേല്പറഞ്ഞവയില് നിന്ന് സ്വീകരിക്കാം. കന്നുകാലികള് കിഴക്കോട്ടോ പടിഞ്ഞാറോട്ടോ മുഖമായി നില്ക്കുന്നതാണ് നല്ലത്. തെക്കോട്ടു മുഖമായോ തെക്കോട്ടു കയറിയോ നില്ക്കുന്നത് നല്ലതല്ല. ഒറ്റ സംഖ്യാപരമായ തൊഴുത്തുകള് ആണ് ഉചിതം. ഒന്ന്, മൂന്ന്, അഞ്ച്, ഏഴ് എന്നീ ക്രമത്തിലാണ് തൊഴുത്തു നിര്മ്മിക്കേണ്ടത്. ആധുനിക യന്ത്രസഹായത്താല് പരിപാലിക്കപ്പെടുന്ന വലിയ തൊഴുത്തുകളില് മുഖത്തോടുമുഖമായോ, വാലോട് വാലായോ കിഴക്ക് പടിഞ്ഞാറ് ദര്ശനം വരുന്ന വിധം തൊഴുത്ത് ക്രമീകരിക്കണം.
ഗോശാല അളവുകള്ക്ക് വൃഷഭയോനി (പഞ്ചയോനി)വളരെ ശുഭകരമാണ്. സിംഹയോനി (ത്രിയോനി) നല്കുകയുമരുത്. മറ്റുള്ളവ മദ്ധ്യമങ്ങളായി സ്വീകരിക്കാം.
ജ്യോതിശ്ശാസ്ത്രപരമായ ശുഭചിന്തയില് അളവ് നല്കുമ്പോള് സിംഹകരണം, പുലികരണം, സ്ഥിരകരണം, ശുനകരണം, കഴുതകരണം എന്നിവ ചേര്ന്ന അളവുകള് സ്വീകരിക്കരുത്.
പുല്തൊട്ടിക്ക് കുറഞ്ഞത് ഒരു കോല് വിസ്താരം വേണം. നാല് ദിക്കുകളിലും ഉള്ള സൂത്രങ്ങള് കടന്നു തൊഴുത്തില് കയറുകയും ഇറങ്ങുകയും ചെയ്യാത്ത രീതിയിലും മറ്റു ഉപാലയങ്ങള്, കിണര് എന്നിവക്ക് വേധം വരാതെ കൃത്യമായ ഗമനത്തോടു കൂടിയും വേണം തൊഴുത്ത് നിര്മിക്കാന്.
ഡോ. രാധാകൃഷ്ണന് ശിവന്
