കുന്നത്തൂര്: ജില്ലാ പഞ്ചായത്ത് കുന്നത്തൂര് ഡിവിഷനില് സ്ഥാനാര്ഥിയെ ചൊല്ലി സിപിഎമ്മില് കലഹം. വിഎസ് വിഭാഗത്തിനെ വെട്ടിനിരത്തി പിണറായിപക്ഷം സീറ്റ് പിടിച്ചെടുത്തു. ജില്ലാ പഞ്ചായത്ത് പ്രസിഡന്റ് നറുക്കെടുപ്പ് പൂര്ത്തിയായതോടെ സ്ഥാനാര്ഥിയാകുമെന്ന് കരുതിയിരുന്നയാളെ ഒഴിവാക്കി പിണറായിപക്ഷനേതാവിനെ അവരോധിക്കുകയായിരുന്നു.
തുടക്കം മുതല് ഡിവിഷനില് സ്ഥാനാര്ഥിയാകുമെന്ന് കരുതിയിരുന്ന എം. ശിവശങ്കരപിള്ളയെയാണ് അവസാനനിമിഷം ഒഴിവാക്കിയത്. സിപിഎം കുന്നത്തൂര് ഏരിയാസെക്രട്ടറി പി.കെ. ഗോപനെയാണ് ഇപ്പോള് സ്ഥാനാര്ഥിയായി ജില്ലാകമ്മറ്റി അംഗീകരിച്ചിരിക്കുന്നത്. ശൂരനാട്ടെ കടുത്ത വിഎസ് പക്ഷ നേതാവായ ശിവശങ്കരപിള്ള നിലവില് സിപിഎം ജില്ലാ സെക്രട്ടറിയേറ്റ് അംഗവും ശൂരനാട് ഡിവിഷനില് നിന്നുള്ള ജില്ലാ പഞ്ചായത്തംംഗവും രണ്ടരവര്ഷം വൈസ് പ്രസിഡന്റുമായിരുന്നു.
പി.കെ. ഗോപന്റെ സ്ഥാനാര്ഥിത്വം അപ്രതീക്ഷിതമായിരുന്നു. ജില്ലാ ലൈബ്രറി കൗണ്സില് പ്രസിഡന്റായിരുന്ന ഗോപന് സംസ്ഥാന ലൈബ്രറി കൗണ്സില് പ്രസിഡന്റ് ആകണമെന്ന് ആഗ്രഹം ഉണ്ടായിരുന്നു. ഇത് നടക്കാതെ വന്നതും വിഎസ് പക്ഷത്തിന്റെ ശക്തനായ വക്താവുമായ ശിവശങ്കരപിള്ള കുന്നത്തൂരില് സ്ഥാനാര്ഥിയാകുമെന്ന പ്രചാരണം ശക്തമായതുമാണ് ഗോപനെ പ്രകോപിതനാക്കിയത്. ജില്ലാ പഞ്ചായത്തില് ഭൂരിപക്ഷം ലഭിച്ചാല് ശിവശങ്കരപിള്ള പ്രസിഡന്റാകാനുള്ള സാധ്യതയും ഏറെയായിരുന്നു. ഇതും സ്ഥാനാര്ഥിത്വം വെട്ടാന് കാരണമായി. മുതിര്ന്ന നേതാവു കൂടിയായ ശിവശങ്കരപിള്ളയെ ഒഴിവാക്കിയതില് കടുത്ത പ്രതിഷേധമാണ് അണികള്ക്കുള്ളത്.
ജില്ലാ ലൈബ്രറി കൗണ്സില് പ്രസിഡന്റ് പദവിയിലെത്തിയപ്പോള് വിദേശ മലയാളി വ്യവസായി നല്കിയ കാര് സ്വീകരിച്ച് ബോര്ഡുവച്ച് ഉപയോഗിച്ചതും ഏരിയ കമ്മറ്റികളില് വിമര്ശനം ഉന്നയിക്കുന്നവര്ക്ക് നേരെ ധാര്ഷ്ട്യത്തോടെ സംസാരിക്കുന്നതുള്പ്പെടെയുള്ള ആരോപണങ്ങള് പി.കെ. ഗോപന് നേരിട്ടിട്ടുണ്ട്.
