കാഞ്ഞാര്‍: തൊടുപുഴ- മൂലമറ്റം റൂട്ടിലുള്ള നിരവധി ബസ് സ്റ്റോപ്പുകളുള്ളത് വളവുകളില്‍. വളവുകളില്‍ ബസ് നിര്‍ത്തി ആളുകളെ കയറ്റുകയും ഇറക്കുകയും ചെയ്യുന്നത് വലിയ അപകട സാധ്യതയാണ് ഉണ്ടാക്കുന്നത്. വളവുകളില്‍ ബസ് നിര്‍ത്തിയിടുന്നതിനാല്‍ ഇരുവശങ്ങളില്‍ നിന്നും വരുന്ന വാഹനങ്ങളിലെ ഡ്രൈവര്‍മാര്‍ക്ക് റോഡ് വേണ്ട വിധം കാണുവാന്‍ കഴിയുന്നില്ല.
പലപ്പോഴും നിര്‍ത്തിയിട്ടിരിക്കുന്ന ബസിനെ മറികടന്ന് എത്തുമ്പോഴാകും എതിര്‍ദിശയിലുള്ള വാഹനം ഡ്രൈവര്‍മാരുടെ ശ്രദ്ധയില്‍പെടുകയുള്ളൂ. ഭാഗ്യം കൊണ്ട് മാത്രമാണ് പല അപകടങ്ങളും ഒഴിവാകുന്നത്. തൊടുപുഴ മുതല്‍ മൂലമറ്റം വരെയുള്ള ബസ് സ്റ്റോപ്പുകളില്‍ 8 എണ്ണം വളവുകളിലാണുള്ളത്. വളവുകളില്‍ ഉള്ള ബസ് സ്റ്റോപ്പുകള്‍ മാറ്റി നിശ്ചയിക്കണമെന്ന ആവശ്യത്തിന് ഏറെ പഴക്കമുണ്ട്.
അപകടം പതിയിരിക്കുന്ന വളവുകളില്‍ അശാസ്ത്രീയമായിട്ടാണ് ബസ് സ്റ്റോപ്പ് നിശ്ചയിട്ടുള്ളത്. വളവുകളിലെ ബസ് സ്റ്റോപ്പ് മാറ്റി നിശ്ചയിക്കുവാന്‍ അധികൃതര്‍ തയാറാകണമെന്ന് നാട്ടുകാര്‍ ആവശ്യപ്പെട്ടു.
