ന്യൂദല്ഹി: ഓസ്ട്രേലിയന് പരമ്പരയ്ക്കുള്ള ഇന്ത്യന് ടീം പ്രഖ്യാപനത്തില് കല്ലുകടികള് മുറുകുന്നു. മുതിര്ന്ന താരം രോഹിത് ശര്മ മൂന്ന് ഫോര്മാറ്റുകളില് നിന്നും പുറത്തുപോയത് എന്തിന്റെ പേരിലാണെന്ന് ഇന്നലെ തന്നെ വിമര്ശനമുയര്ന്നതാണ്. കഴിഞ്ഞ ഐപിഎല് മത്സരങ്ങളില് താരം പരിക്ക് മൂലം കളിച്ചിരുന്നില്ല. പരിക്കിന്റെ പിടിയിലായതിനാലായിരിക്കാം ഇന്ത്യന് ടീമില് നിന്ന് പുറത്താക്കപ്പെട്ടതെന്നായിരുന്നു നിഗമനം.
എന്നാല് രോഹിത്തിനെ ഉള്പ്പെടുത്താതെ ബിസിസിഐ ടീം പ്രഖ്യാപനം നടത്തിയതിന് പിന്നാലെ മുംബൈ ഇന്ത്യന്സ് താരത്തിന്റെ പരിശീലന ചിത്രങ്ങള് പുറത്തുവിട്ടു. തങ്ങള് കാത്തിരുന്ന ദൃശ്യങ്ങള് എന്ന വാചകത്തോടെ പരിശീലനം നടത്തുന്ന രോഹിത്തിന്റെ ചിത്രങ്ങളാണ് പുറത്തുവിട്ടത്. ഇത് സമൂഹമാധ്യമത്തില് വലിയ ചര്ച്ചക്ക് വഴിയൊരുക്കി. മണിക്കൂറുകള്ക്ക് പിന്നലെ രോഹിത് പരിക്കിന്റെ സൂചനകളൊന്നും കാണിക്കാതെ പരിശീലനം നടത്തുന്ന വീഡിയോയും മുംബൈ ട്വീറ്റ് ചെയ്തു. ഇതോടെ ടീം തെരഞ്ഞെടുപ്പില് സംശയം പ്രകടിപ്പിച്ച് മുന് താരങ്ങളടക്കം ട്വിറ്ററില് നിറഞ്ഞു.
പരിശീലനം നടത്തുന്ന രോഹിത് പുറത്ത്, പരിക്കേറ്റ മായങ്ക് അഗര്വാള് ടീമിനുള്ളിലും. രോഹിത്തിന്റെ യത്ഥാര്ഥ വിവരമറിയാന് അവകാശമുണ്ടെന്നും സുനില് ഗവാസ്കര് പറഞ്ഞു. ബിസിസിഐ പുറത്തുവിട്ട കുറിപ്പില് രോഹിത്തിന്റെ ആരോഗ്യ സ്ഥിതി പരിശോധിക്കും എന്ന് മാത്രമാണുള്ളത്. എന്നാല് എന്തിനാണ് താരത്തെ ഒഴിവാക്കിയതെന്ന് വ്യക്തമാക്കിയിട്ടില്ല. ഒന്നരമാസം കഴിഞ്ഞാണ് ഓസ്ട്രേലിയന് പരമ്പര നടക്കുക. നിലവില് പരിശീലനം നടത്തുന്ന രോഹിത്തിന് ഒന്നരമാസം കഴിയുമ്പോള് പരിക്ക് ഭേദമാകില്ലേയെന്നും ഗവാസ്കര് ചോദിച്ചു.
ജന്മഭൂമി ഓണ്ലൈന്