നെടുങ്കണ്ടം: മദ്യപിച്ചശേഷം ചീട്ടുകളിക്കുന്നതിനിടെ വിമുക്തഭടനെ സുഹൃത്ത് കോടാലിക്ക് വെട്ടിക്കൊന്നു. ചീട്ടുകളിക്കിടെയുണ്ടായ തര്ക്കമാണ് കൊലപാതകത്തില് കലാശിച്ചത്.
കരുണാപുരം തണ്ണിപ്പാറ ജാനകിമന്ദിരത്തില് രാമഭദ്രന്(78) ആണ് കൊല്ലപ്പെട്ടത്. രാമഭദ്രന്റെ സുഹൃത്തായ തണ്ണിപ്പാറ തെങ്ങുപള്ളി ജോര്ജുകുട്ടി(വര്ഗീസ്- 61)യെ കമ്പംമെട്ട് പോലീസ് അറസ്റ്റ് ചെയ്തു. ജോര്ജുകുട്ടിയുടെ വീട്ടിനുള്ളിലാണ് ദാരുണമായ കൊലപാതകം നടന്നത്. ജോര്ജുകുട്ടിയുടെ തലയ്ക്കും പരിക്കുണ്ട്. ചാരായം സ്വന്തമായി വാറ്റിയശേഷം ജോര്ജുകുട്ടിയും രാമഭദ്രനും സ്ഥിരമായി മദ്യപിച്ചിരുന്നതായി നാട്ടുകാര് പറയുന്നു.
ശനിയാഴ്ച രാത്രി 8.30ന് കൊലപാതകം നടന്നതായാണ് പോലീസ് നിഗമനം. ഭാര്യമാരുടെ മരണശേഷം രാമഭദ്രനും ജോര്ജ്ജുകുട്ടിയും അവരുടെ വീടുകളില് തനിച്ചായിരുന്നു താമസിച്ചിരുന്നത്. ഇരുവരും വാറ്റ് ചാരായം നിര്മ്മിച്ച് കുടിക്കുകയും ചീട്ടുകളിക്കുകയും ചെയ്യുന്നത് പതിവായിരുന്നു. ശനിയാഴ്ച ജോര്ജ്ജുകുട്ടിയുടെ വീട്ടില്വെച്ച് ഇരുവരും മദ്യപിക്കുകയും തുടര്ന്ന് ചീട്ടുകളിക്കുകയും ചെയ്തു. ചീട്ടുകളിയെത്തുടര്ന്നുണ്ടായ തര്ക്കമാണ് കൊലപാതകത്തിലേക്ക് നയിച്ചതെന്ന് കമ്പംമെട്ട് പോലീസ് പറഞ്ഞു. മൃതദേഹം പോസ്റ്റുമോര്ട്ടത്തിനായി കോട്ടയം മെഡിക്കല് കോളജിലേക്ക് മാറ്റി. രാമഭദ്രന്റെ ഭാര്യ സാവിത്രി വര്ഷങ്ങള്ക്ക് മുമ്പ് മരിച്ചു. മക്കള്: മിനി, ബിന്ദു, ബിജു. മരുമക്കള്: വിമലന്, ഷിബു, ഉഷ.
കട്ടപ്പന ഡിവൈഎസ്പി എന്.സി. രാജ്മോഹന്, കമ്പംമെട്ട് സിഐ ജി. സുനില്കുമാര്, എസ്ഐ രാജന് എന്നിവരുടെ നേതൃത്വത്തില് വിരലടയാള വിദഗ്ധരും ഫോറന്സിക് സര്ജനും സ്ഥലത്ത് പരിശോധന നടത്തി.
