ശാസ്താംകോട്ട: മാനസിക വൈകല്യമുള്ള യുവാവിനെ ക്രൂരമര്ദ്ദനത്തിനിരയാക്കിയ സംഭവത്തില് മൂന്നുപേര് പിടിയിലായി. ശൂരനാട് തെക്ക് തൃക്കുന്നപ്പുഴ വടക്ക് രാജേഷ് ഭവനില് രാജേഷ് (25) ആണ് ക്രൂരമായി അക്രമിക്കപ്പെട്ടത്.
കഴിഞ്ഞ 13ന് മാനസികവിഭ്രാന്തി കാട്ടിയ രാജേഷിനെ പ്രദേശവാസികളായ ഒരുസംഘം വളഞ്ഞിട്ട് മര്ദ്ദിക്കുകയായിരുന്നു. അടി കൊണ്ട് നിലത്തുവീണ ഇയാളെ ചുറ്റും നിന്ന് ചവിട്ടി പരിക്കേല്പ്പിച്ചു. വലതുകാല് പിരിച്ച് ഒടിച്ചു. നട്ടെല്ലിനും ക്ഷതമേല്പ്പിച്ചു. കാല്മുട്ടിന്റെ ചിരട്ട തകര്ന്നു. അബോധാവസ്ഥയില് റോഡില് കിടന്ന രാജേഷിനെ പോലീസിന്റെ സഹായത്തോടെ ആംബുലന്സിലാണ് ആലപ്പുഴ മെഡിക്കല് കോളേജില് എത്തിച്ചത്.
സംഭവവുമായി ബന്ധപ്പെട്ട തൃക്കുന്നപ്പുഴ വടക്ക് തോണ്ടലില് രാജേഷ് (38), കാട്ടൂര് വടക്കതില് സന്തോഷ് കുമാര് (30), ഇയാളുടെ സഹോദരന് വിഷ്ണു (25) എന്നിവരെ ശൂരനാട് എസ്ഐ പി. ശ്രീജിത്തിന്റെ നേതൃത്വത്തിലുള്ള സംഘം അറസ്റ്റ് ചെയ്തു. കോടതിയില് ഹാജരാക്കിയ പ്രതികളെ പതിനാല് ദിവസത്തേക്ക് റിമാന്ഡ് ചെയ്തു.
