അടിമാലി: ആയൂര്‍വ്വേദ ആശുപത്രിയില്‍ ചികിത്സക്കെത്തിയ 22കാരിയെ പീഡിപ്പിക്കാന്‍ ശ്രമിച്ച പാതിരിയെ പോലീസ് അറസ്റ്റ് ചെയ്തു. പണിക്കന്‍കുടി യാക്കോബായ പള്ളി പാതിരിയും അടിമാലി പാലക്കാടന്‍ ആയൂര്‍വ്വേദ ആശുപത്രി ഉടമയുമായ ഫാ. റെജി പാലക്കാടനാണ് പിടിയിലായത്.
തിങ്കളാഴ്ച ആണ് കേസിനാസ്പദമായ സംഭവം. രാത്രിയോടെ തന്നെ വികാരിയെ അടിമാലി സിഐ അനില്‍ ജോര്‍ജ്ജിന്റെ നേത്യത്വത്തില്‍ കസ്റ്റഡിയില്‍ എടുക്കുകയായിരുന്നു. അടിമാലി സ്വദേശിയായ യുവതി ചികിത്സ തേടിയാണ് അമ്മയോടൊപ്പം ആശുപത്രിയിലെത്തിയത്. എന്നാല്‍ ഡോക്ടറായ പാതിരിയെ ഇവിടെ വെച്ച് യുവതിയെ പീഡിപ്പിക്കാന്‍ ശ്രമിച്ചതായാണ് പോലീസ് നല്‍കുന്ന വിവരം. വീട്ടിലെത്തിയ ശേഷം യുവതി ഈ വിവരം ബന്ധുക്കളെ വിവരം അറിയിച്ചു. തുടര്‍ന്ന് ആശുപത്രിയില്‍ ബന്ധുക്കള്‍ പാതിരിയോട് ഇക്കാര്യം ആരാഞ്ഞു. ബഹളം ആയതോടെ സ്ഥലത്ത് ആളുകള്‍ കൂടി. പോലീസെത്തിയാണ് ഇരുവരേയും സ്‌റ്റേഷനിലേക്ക് മാറ്റിയത്. ഇതിന് ശേഷമാണ് പരാതി നല്‍കിയത്.
പെണ്‍കുട്ടി നല്‍കിയ മൊഴിയുടെ അടിസ്ഥാനത്തില്‍ പാതിരിക്കെതിരെ കേസ് രജിസ്റ്റര്‍ ചെയ്യുകയായിരുന്നു. അടിമാലി ജുഡിഷ്യല്‍ മജിസ്ട്രേറ്റ് കോടതിയില്‍ ഹാജരാക്കിയ പ്രതിയെ വൈകിട്ടോടെ റിമാന്‍ഡ് ചെയ്തു.
