കോഴിക്കോട്: നടുറോട്ടില് നഴ്സുമാര്ക്കുനേരെ അതിക്രമം. ബീച്ച് ആശുപത്രിയില് കോവിഡ് ഡ്യൂട്ടിയിലുള്ള രണ്ട് നഴ്സുമാര്ക്ക് നേരെയാണ് അതിക്രമം നടന്നത്. ഒക്ടോബര് അഞ്ചിന് രാത്രി പന്ത്രണ്ടു മണിയോടെ ടാഗോര് സെന്ററിനറി ഹാളിനു സമീപം വെച്ചായിരുന്നു അക്രമം. സ്കൂട്ടറില് ഡ്യൂട്ടിയ്ക്ക് പോവുകയായിരുന്ന നഴ്സുമാരെ ബൈക്കില് പിന്തുടര്ന്ന് തടഞ്ഞു നിര്ത്തി അക്രമിക്കുകയായിരുന്നു. അക്രമി എത്തിയ ബൈക്കിന് നമ്പര് പ്ലേറ്റ് ഉണ്ടായിരുന്നില്ല.
ബീച്ച് ആശുപത്രിയില് കോവിഡ് ഡ്യൂട്ടിയില് ജോലി ചെയ്യുന്ന നഴ്സുമാര്ക്ക് നഗരത്തില് മാവൂര് റോഡിനു സമീപത്തുള്ള ലോഡ്ജിലാണ് താമസത്തിന് സൗകര്യം ഒരുക്കിയിരിക്കുന്നത്. ഇവിടെ നിന്നും രാത്രി ഷിഫ്റ്റില് ജോലി ചെയ്യുന്നതിനായി പോയ നഴ്സുമാര്ക്ക് നേരെയാണ് അതിക്രമം ഉണ്ടായത്. സിഎച്ച് ഓവര് ബ്രിഡ്ജിനു സമീപം വെച്ച് നഴ്സുമാരുടെ സ്കൂട്ടറിനെ അക്രമി മറികടക്കുകയായിരുന്നു. ടാഗോര് സെന്ററിനറി ഹാളിനു സമീപം വച്ച് ബൈക്ക്, സ്കൂട്ടറിന് കുറുകെയിട്ട് നഴ്സുമാരെ കയറിപ്പിടിക്കാന് ശ്രമിക്കുകയായിരുന്നു. ഇതിനിടെ ഇവരുടെ സ്കൂട്ടര് മറിഞ്ഞു വീണെങ്കിലും ഇരുവരും ധൈര്യം സംഭരിച്ച് രക്ഷപ്പെടുകയായിരുന്നു.
നഴ്സുമാര്ക്ക് നേരെ അതിക്രമം നടന്നതായി പോലീസും സ്ഥിരീകരിച്ചു. എന്നാല് രേഖാമൂലമുള്ള പരാതി ലഭിക്കാത്തതിനാല് കേസ് രജിസ്റ്റര് ചെയ്തിട്ടില്ലെന്നും അന്വേഷണം നടക്കുന്നുണ്ടെന്നുമാണ് പോലീസ് പറയുന്നത്. സിസിടിവി ദൃശ്യങ്ങള് പരിശോധിക്കുന്നുണ്ടെന്നും പോലീസ് അറിയിച്ചു.
പ്രതികരിക്കാൻ ഇവിടെ എഴുതുക: