നമോവാകം സംയോഗീ
നമോവാകം ഗുരോ നിന്നുടെ
പാവനമാം സ്മരണക്കു
നന്മ തന്നുടെ ജയത്തിന്നായ്
നീയുതിർത്ത വാക്കുകൾക്ക്
നീചശക്തിക്കെതിരെ നീ
ചലിപ്പിച്ച തൂലികക്ക്
പരശ്ശതം പ്രണാമം മമ
പരമേശ്വരാ നിന്റെ മുന്നിൽ
അദ്വൈതമന്ത്രസുധ ചൊരിഞ്ഞ
ആദിഗുരുവാം ശങ്കരനും
പരമഭട്ടാരകൻ മുനിയും
പതിതമോചകൻ മാഗുരുവും
അമൃതമൂറും കിളിപ്പാട്ടും
ഭക്തിയൂറും ഗാഥകളും
ജന്മം കൊണ്ട ധന്യ ഭൂവിന്
നിന്റെ കർമ്മം മേന്മയേകി
ഉന്നതമാം പൈതൃകത്തെ
വിസ്മരിച്ചൊരു ജനതതന്റെ
അന്ധമാം വിശ്വാസങ്ങളും
കാട്ടു നീതിതൻ ശാസ്ത്രവും
കണ്ടറച്ചൊരു മാനവേന്ദ്രൻ
ഭ്രാന്തഗേഹമെന്നോതിയപ്പോൾ
ഭ്രാന്താലയേ നിന്നുമവരെ
തീർത്ഥാലയേ നീനയിച്ചു
ദീർഘദർശി നരേന്ദ്രൻ
മഹായോഗിയരവിന്ദൻ
ക്രാന്തദർശിയാം കേശവനും
നിന്നിലഗ്നിപ്പൊരി പകർന്നു
ദേവഭാഷയും യോഗയും നീ
ഗീതയുമാജ്യമായേകി
ആളിക്കത്തിയൊരാ ജ്വാല
അന്ധകാരമകറ്റി മാറ്റി
നമോവാകം ഗുരോ നിന്നുടെ
പാവനമാം സ്മരണക്കു
പരശ്ശതം പ്രണാമം മമ
പരമേശ്വരാ നിന്റെ മുന്നിൽ
വെങ്കിട് ശര്മ്മ
