ചെന്നൈ : ഗായകന്‍ എസ്.പി.ബാലസുബ്രഹ്മണ്യത്തിന്റെ സംസ്‌കാര ചടങ്ങുകള്‍ പൂര്‍ത്തിയായി. ചെന്നൈ റെഡ് ഹില്‍സിലെ അദ്ദേഹത്തിന്റെ ഫാം ഹൗസിലാണ് സംസ്‌കാര ചടങ്ങുകള്‍ നടന്നത്. പൂര്‍ണ ഔദ്യോഗിക ബഹുമതികളോടെയായിരുന്നു ചടങ്ങ്.
കൊറോണ വൈറസ് പ്രോട്ടോക്കോള്‍ നിലനില്‍ക്കുന്നതിനാല്‍ അന്ത്യോപചാരം അര്‍പ്പിക്കുന്നതിന് നിയന്ത്രണങ്ങള്‍ ഏര്‍പ്പെടുത്തിയിരുന്നു. അന്ത്യാഞ്ജലി അര്‍പ്പിക്കാന്‍ ചലച്ചിത്ര താരങ്ങളായ വിജയ്, അര്‍ജുന്‍, റഹ്മാന്‍, സംവിധായകരായ ഭാരതിരാജ, അമീര്‍ തുടങ്ങിയവരും നൂറുകണക്കിന് ആരാധകരും റെഡ് ഹില്‍സില്‍ എത്തി. കോടമ്പാക്കത്തെ വീട്ടില്‍ മൃതദേഹം പൊതുദര്‍ശനത്തിന് വച്ച സമയത്തും നൂറുകണക്കിന് ആരാധകരാണ് അന്ത്യോപചാരം അര്‍പ്പിക്കാനായി എത്തിയത്.
ഹൃദയാഘാതത്തെ തുടര്‍ന്ന് ചൈന്നൈയിലെ സ്വാകാര്യ ആശുപത്രിയില്‍ വെച്ചാണ് എസിപിബി മരണമടയുന്നത്. കൊറോണ വൈറസ് രോഗബാധിതനായതിനെ തുടര്‍ന്ന് ഓഗസ്റ്റ് 5 മുതല്‍ അദ്ദേഹം ചികിത്സയിലായിരുന്നു. ഈ മാസം 4ന് നെഗറ്റീവ് ആയെങ്കിലും ശ്വസന സംബന്ധമായ പ്രശ്‌നങ്ങള്‍ മൂലം വെന്റിലേറ്ററില്‍ തുടരുകയായിരുന്നു. വ്യാഴാഴ്ച വൈകിട്ട് ആരോഗ്യ നില വീണ്ടും വഷളാവുകയും വെള്ളിയാഴ്ചയോടെ മരണമടയുകയുമായിരുന്നു.
