തൃശൂര്‍: ലൈഫ് മിഷന്‍ ഫഌറ്റ് തട്ടിപ്പ് കേസില്‍ കുരുക്കിലായി മന്ത്രി ഇ.പി. ജയരാജന്‍. ഇടപാടിന്റെ പ്രധാന സൂത്രധാരന്‍ ഇ.പി. ജയരാജനാണെന്ന വിവരം അന്വേഷണസംഘത്തിന് ലഭിച്ചു. കരാറിന് പിന്നില്‍ മന്ത്രിസഭയിലെ രണ്ടാമനായ ജയരാജനാണെന്ന് ആദ്യം വാര്‍ത്ത നല്‍കിയത് ജന്മഭൂമിയാണ്. കഴിഞ്ഞ ആഗസ്റ്റ് 15ന് തന്നെ ഇതു സംബന്ധിച്ച വാര്‍ത്ത ജന്മഭൂമി പ്രസിദ്ധീകരിച്ചിരുന്നു.
ഒരു മാസം മുന്‍പ് മുതല്‍ ഇ.പി. ജയരാജനെ കേന്ദ്രീകരിച്ച് അന്വേഷണം ആരംഭിച്ചിട്ടുണ്ട്. ജയരാജന്റെ മകന്‍ ജെയ്‌സണ് സ്വപ്‌നയുമായുള്ള ബന്ധവും അന്വേഷണസംഘത്തിന് വ്യക്തമായി. മന്ത്രിയുടെ ഭാര്യ പി.കെ. ഇന്ദിര ക്വാറന്റൈന്‍ ലംഘിച്ച് കണ്ണൂര്‍ ജില്ലാ ബാങ്കിലെത്തി ലോക്കര്‍ തുറന്നത് എന്തിനെന്നും അന്വേഷണം ആരംഭിച്ചു. മുഖ്യമന്ത്രിയുടേയും, സ്വപ്നയും ശിവശങ്കറും ഉള്‍പ്പെടെയുള്ള സംഘത്തിന്റെയും ദുബായ് സന്ദര്‍ശനത്തിന് പിന്നിലെ ആസൂത്രണം പൂര്‍ണമായും ജയരാജന്റേതായിരുന്നുവെന്നാണ് അന്വേഷണസംഘത്തിന് ലഭിച്ചിട്ടുള്ള വിവരം.
ഇതിനു ശേഷവും ഇടപാടിന്റെ ഭാഗമായി ജയരാജന്‍ ഒന്നിലേറെത്തവണ ദുബായ് സന്ദര്‍ശിച്ചു. ഔദ്യോഗിക രേഖകളിലില്ലാത്ത ഈ യാത്രകള്‍ സ്വകാര്യമായിരുന്നുവെന്നാണ് മന്ത്രി അവകാശപ്പെടുന്നത്. സ്വര്‍ണക്കള്ളക്കടത്ത് കേസില്‍ പ്രതികളായ ചിലരുമായും മന്ത്രി ബന്ധപ്പെട്ടതായ വിവരങ്ങള്‍ അന്വേഷണസംഘത്തിന് ലഭിച്ചു. റെഡ്ക്രസന്റുമായുള്ള ഇടപാട് ദുബായിലും കേരളത്തിലും പൂര്‍ണമായും നിയന്ത്രിച്ചിരുന്നതും ജയരാജനായിരുന്നു. ജയരാജന്റെ നിര്‍ദ്ദേശാനുസരണമാണ് എല്ലാം നടന്നതെന്നാണ് മൊഴികളില്‍ നിന്ന് അന്വേഷണ സംഘത്തിന് ബോധ്യമായത്.
ഇ.പി. ജയരാജനെയും മന്ത്രി എ.സി. മൊയ്തീനെയും വൈകാതെ എന്‍ഫോഴ്‌സ്‌മെന്റ് ഡയറക്ടറേറ്റ് ചോദ്യം ചെയ്‌തേക്കും. യൂണിടാക്കിന് കരാര്‍ നല്‍കിയത് ജയരാജന്റെയും മൊയ്തീന്റെയും നിര്‍ദ്ദേശ പ്രകാരമായിരുന്നുവെന്ന് ഉദ്യോഗസ്ഥരുടെ മൊഴിയിലുണ്ട്. കരാറിന് മണിക്കൂറുകള്‍കൊണ്ട് അംഗീകാരം നല്‍കാന്‍ കടുത്ത സമ്മര്‍ദ്ദമാണ് ഉണ്ടായിരുന്നതെന്ന് ഉദ്യോഗസ്ഥര്‍ വെളിപ്പെടുത്തിയിട്ടുണ്ട്. ലൈഫ് മിഷന്‍ സിഇഒ യു.വി. ജോസ്, തദ്ദേശ സെക്രട്ടറിയായിരുന്ന ടി.കെ. ജോസ് എന്നിവരെയും ചോദ്യം ചെയ്‌തേക്കും.
ലൈഫ് മിഷന്‍ ഫഌറ്റ് നിര്‍മ്മാണത്തിന് ആദ്യം കണ്ടെത്തിയ സ്ഥലം മലപ്പുറം ജില്ലയിലായിരുന്നുവെങ്കിലും പിന്നീട് വടക്കാഞ്ചേരിയിലേക്ക് മാറ്റുകയായിരുന്നു. വടക്കാഞ്ചേരിയിലെ നിര്‍ദ്ദിഷ്ട സ്ഥലം നിര്‍മ്മാണത്തിന് അനുയോജ്യമല്ലെന്ന് തൃശൂര്‍ കളക്ടറായിരുന്ന ടി.വി. അനുപമ റിപ്പോര്‍ട്ട് നല്‍കിയെങ്കിലും ദിവസങ്ങള്‍ക്കുള്ളില്‍ കളക്ടറെത്തന്നെ മാറ്റി.
അന്വേഷണം മുറുകുന്നതോടെ പാര്‍ട്ടിയിലും വലിയ പ്രതിസന്ധി ഉടലെടുക്കുകയാണ്. ഇടപാടിനെക്കുറിച്ച് പാര്‍ട്ടിതലത്തില്‍ അന്വേഷണം വേണമെന്ന് സംസ്ഥാന സെക്രട്ടേറിയറ്റംഗം ബേബി ജോണ്‍ രേഖാമൂലം ആവശ്യപ്പെട്ടെങ്കിലും നേതൃത്വം നിരാകരിച്ചു. സിപിഎമ്മില്‍ പിണറായി വിജയനുമായി ഏറ്റവും അടുപ്പമുള്ള നേതാവാണ് ഇ.പി. ജയരാജന്‍. ജയരാജന്റെ എല്ലാ ഇടപാടുകളും പിണറായി അറിഞ്ഞു തന്നെയാണ് എന്നാണ് സൂചനകള്‍.
ജന്മഭൂമി ഓണ്‍ലൈന്‍