തിരുവനന്തപുരം : ലൈഫ് മിഷന് തട്ടിപ്പില് മന്ത്രി ഇ.പി. ജയരാജന്റെ മകനും പങ്കുണ്ടെന്ന ആരോപണത്തില് അന്വേഷണം വേണമെന്ന് ബിജെപി സംസ്ഥാന അധ്യക്ഷന്. ലൈഫ് മിഷനില് നിന്ന് ഒരു കോടിയോളം രൂപ ഇ.പി. ജയരാജന്റെ മകന് കൈപ്പറ്റിയെന്നതാണ് ആരോപണം.
വിഷയത്തില് കേന്ദ്ര ഏജന്സി അന്വേഷണം നടത്തിയത് മുഖ്യമന്ത്രിയുടെ കത്തിന്റെ അടിസ്ഥാനത്തിലാണ് അന്വേഷണം ആരംഭിച്ചത് എന്നാണ് സിപിഎം നേരത്തെ അവകാശപ്പെട്ടത്. എന്നാല് കേസില് സര്ക്കാരിലും പാര്ട്ടിയിലും ഉള്ളവര് കടുങ്ങുമെന്നായപ്പോള് അവര് അന്വേഷണ ഏജന്സികളെ വിമര്ശിക്കുകയാണ്. ജലീലിനെ കൂടാതെ ഇ.പി. ജയരാജന്റെ മകന്റെ പേരും ഉയര്ന്നുവന്നതോടെയാണ് ഇതിന് കാരണമെന്നും സുരേന്ദ്രന് ആരോപിച്ചു.
കേന്ദ്ര അന്വേഷണ ഏജന്സികളെ കുറ്റപ്പെടുത്തുന്നത് അപലപനീയമാണ്. നിയമ വാഴ്ചയോടുള്ള വെല്ലുവിളിയാണ്. കേന്ദ്ര ഏജന്സികളുടെ അന്വേഷണം ശരിയായ ദിശയില് എന്നാണ് മുഖ്യമന്ത്രി പറഞ്ഞിരുന്നത്. ഇപ്പോള് ഇഡിക്കെതിരെ തിരിഞ്ഞത് വമ്പന് സ്രാവുകള് കുടുങ്ങുമോ എന്ന ഭയം കാരണമാണ്. ഇതുമായി ബന്ധപ്പെട്ടുള്ള അന്വേഷണം രാഷ്ട്രീയ പ്രേരിതമാണ് എന്ന ആരോപണത്തോട് മുഖ്യമന്ത്രി മറുപടി പറയണം.
ജെ.ടി.ജലീലിനെ കൂടാതെ മന്ത്രിസഭയിലെ രണ്ടാമനായിട്ടുളള മന്ത്രിയെ കുറിച്ചുകൂടി കൂടുതല് തെളിവുകള് പുറത്തുവരികയാണ്. ഇതോടെ കേസ് അന്വേഷണം ഏതെങ്കിലും വിധത്തില് തന്നിലേക്ക് എത്തുമോയെന്നും മുഖ്യമന്ത്രി ഭയപ്പെടുന്നു. സ്വപ്ന സുരേഷ് ആശുപത്രിയില് ജീവനക്കാരുടെ ഫോണ് ഉപയോഗിച്ച് ചില ഉന്നതരെ ബന്ധപ്പെട്ടതായാണ് വിവരം. സര്ക്കാരാണ് ഇതിന് അവസരമൊരുക്കിയത്. സ്വപ്ന സുരേഷിനെ കേരളാ പോലീസിന് വിട്ടുകൊടുക്കാനുള്ള നീക്കം കേസന്വേഷണം അട്ടിമറിക്കാനാണ്. ജലീല് ചില മാധ്യമങ്ങളെ കൂട്ടുപിടിച്ച് വ്യാജവാര്ത്തകള് പ്രചരിപ്പിക്കുകയാണ്. സ്വപ്നയും ജലീലും ഒരേ തൂവല് പക്ഷികളാണ്.
കഴിഞ്ഞ രണ്ടുമാസമായി അന്വേഷണം ശരിയായ ദിശയിലാണ്. കേന്ദ്ര ഏജന്സികള് അന്വേഷിക്കട്ടെ തങ്ങള്ക്ക് ഭയമില്ല. അന്വേഷണത്തെ സ്വാഗതം ചെയ്യുന്നുവെന്ന് പറഞ്ഞവര് ഇപ്പോള് പരസ്യമായാണ് ഇതിനെതിരെ രംഗത്തെത്തിയിരിക്കുന്നത്.
ഇഡി രാഷ്ട്രീയ പ്രേരിതമായി പ്രവര്ത്തിക്കുന്നുവെന്ന സിപിഎം സെക്രട്ടറിയേറ്റിന്റെ ആരോപണത്തോട് മുഖ്യമന്ത്രി പ്രതികരിക്കണം. മുഖ്യമന്ത്രി ഔദ്യോഗികമായി ഔപചാരികമായി സിപിഎം സംസ്ഥാന സെക്രട്ടറിയേറ്റിന്റെ ആരോപണം അംഗീകരിക്കുന്നുണ്ടോ നിരാകരിക്കുന്നുണ്ടോ എന്നറിയാന് കേരളത്തിലെ ജനങ്ങള്ക്ക് ആഗ്രഹമുണ്ടെന്നും സുരേന്ദ്രന് കൂട്ടിച്ചേര്ത്തു.
