ലണ്ടന് : വാക്സിന് കുത്തിവെച്ചതില് ഒരാള്ക്ക് അജ്ഞാത രോഗം ബാധിച്ചതായി കണ്ടെത്തിയതിനെ തുടര്ന്ന് ഓക്സ്ഫോഡ് സര്വ്വകലാശാല കൊറോണ വൈറസ് വാകേസിന് പരീക്ഷണം നിര്ത്തിവെച്ചു. ബ്രിട്ടീഷ് ബഹുരാഷ്ട്ര മരുന്ന് കമ്പനിയായ അസ്ട്ര സെനേക്കയുമായി ചേര്ന്നുള്ള പരീക്ഷണമാണ് ഇപ്പോള് നിര്ത്തിവെച്ചിരിക്കുന്നത്. വാക്സിന്റെ മൂന്നാംഘട്ട പരീക്ഷണമാണ് നടന്നുവന്നിരുന്നത്.
വാക്സിന് കുത്തിവെച്ച വൊളന്റിയര്മാരില് ഒരാള്ക്ക് മരുന്നിന്റെ പാര്ശ്വഫലമായാണോ അജ്ഞാതരോഗം ബാധിച്ചതെന്ന് സംശയം ഉയര്ന്നിട്ടുണ്ട്. എന്നാല് എവിടെയുള്ള രോഗിയ്ക്കാണ് പുതിയ രോഗം സ്ഥിരീകരിച്ചതെന്നോ എന്ത് തരം രോഗമാണെന്നോ രോഗത്തിന്റെ തീവ്രതയെന്തെന്നോ പുറത്തുവിട്ടിട്ടില്ല. 30,000 ല് അധികം വോളണ്ടിയര്മാരാണ് വിവിധയിടങ്ങളിലായി വാക്സിന് പരീക്ഷണത്തിനുള്ളത്.
ജൂലായ് 20-നാണ് ഓക്സ്ഫഡ് സര്വകലാശാല കൊറോണ വാക്സിന് വികസിപ്പിച്ചെടുത്തത്. മൃഗങ്ങളിലെ പരീക്ഷണം വിജയകരമായതിനു പിന്നാലെയാണ് മനുഷ്യരിലെ പരീക്ഷണം ആരംഭിച്ചത്. ആദ്യ രണ്ട് ഘട്ട പരീക്ഷണം വിജയകരമായിരുന്നു. ഇതില് ഗുരുതര പാര്ശ്വഫലങ്ങള് കണ്ടെത്തിയിരുന്നില്ല. ഇതോടെയാണ് അവസാനഘട്ട പരീക്ഷണം നടത്തിയത്.
അതേസമയം ഇത് സാധാരണ നടപടിക്രമം മാത്രമാണെന്ന് അസ്ട്രസെനേക അറിയിച്ചു. ഇതില് ആശങ്കപ്പെടേണ്ടതില്ല. പാര്ശ്വഫലമെന്ന് സംശയിക്കുന്ന രോഗം പഠിച്ചശേഷം പരീക്ഷണം തുടരുമെന്ന് കമ്പനി അധികൃതര് പറഞ്ഞു. പരീക്ഷണത്തില് പങ്കെടുക്കുന്ന സന്നദ്ധപ്രവര്ത്തകരുടെ സുരക്ഷയ്ക്കാണ് പ്രാധാന്യം. ഇതിന് മുന്തൂക്കം നല്കിക്കൊണ്ടാണ് പരീക്ഷണം ഇപ്പോള് നിര്ത്തിവെച്ചിരിക്കുന്നതെന്നും അധികൃതര് കൂട്ടിച്ചേര്ത്തു.
