ആലപ്പുഴ: ഭാരതീയ ജ്ഞാനപാരമ്പര്യം ചോര്‍ന്നുപോകാതെ പുതു തലമുറയില്‍ എത്തിക്കണമെന്നും അതിനായുള്ള പഠന ഗവേഷണങ്ങള്‍ ഏറ്റെടുക്കുവാന്‍ അക്കാദമിക വിദഗ്ദരും പണ്ഡിതരും തയ്യാറാകണമെന്ന് ഭാരതീയ വിചാര കേന്ദ്രം ജോ:ഡയറക്ടര്‍ ആര്‍.സഞ്ജയന്‍ പറഞ്ഞു. സംസ്ഥാന പഠനശിബിരം വെബിലൂടെ ഉത്ഘാടനം ചെയ്യുകയായിരുന്നു. രാജാറാം മോഹന്‍ റോയ് , ശ്രീരാമകൃഷണ പരമഹംസര്‍, സ്വാമി വിവേകാനന്ദന്‍, ശ്രീ നാരായണ ഗുരുദേവന്‍, രമണമഹര്‍ഷി , മഹര്‍ഷി അരവിന്ദോ, മുതലായവര്‍ സനാതന ധര്‍മ്മത്തില്‍ അധിഷ്ഠിതമായ ജ്ഞാന പാരമ്പര്യത്തിലൂടെയാണ് സാമൂഹിക നവോത്ഥാനം സാധ്യമാക്കിയതെന്നും അദ്ദേഹം പറഞ്ഞു. സംസ്ഥാന ആദ്ധ്യക്ഷന്‍ ഡോ: കെ.മോഹന്‍ദാസ് അദ്ധ്യക്ഷനായി.
ഭാരതീയവിചാരകേന്ദ്രം ചരിത്രം പശ്ചാത്തലം എന്ന വിഷയം സംസ്ഥാന ജനറല്‍ സെക്രട്ടറി കെ.സി. സുധീര്‍ ബാബു, അവതരിപ്പിച്ചു. ഓര്‍ഗനൈസിങ് സെക്രട്ടറി മഹേഷ്, സെക്രട്ടറി ജെ. മഹാദേവന്‍, ശ്രീലക്ഷ്മി എന്നിവര്‍ സംസാരിച്ചു.
12 വരെ രാത്രി 7.30 മുതല്‍ 9 വരെയാണ് പഠന ശിബിരം. ഭാരതത്തിന്റെ ജ്ഞാനപാരമ്പര്യം – ആയൂര്‍വേദം എന്ന വിഷയം ഡോ.ജി. അശോകനും, മാപ്പിള ലഹള എന്ന വിഷയം കാസര്‍കോഡ് കേന്ദ്ര യൂണിവേഴ്‌സിറ്റി പ്രോ വൈസ് ചാന്‍സിലര്‍ ഡോ: കെ.ജയപ്രസാദും അവതരിപ്പിച്ചു. ചൊവ്വാഴ്ച ആര്‍എസ്എസ് പ്രാന്തീയ ബൗദ്ധിക് പ്രമുഖ് കെ.പി.രാധാകൃഷ്ണന്‍ ‘കേരള നവോത്ഥാനം – നാള്‍വഴികള്‍ ‘ എന്ന വിഷയം അവതരിപ്പിക്കും. ബുധനാഴ്ച സമാപനപരിപാടിയില്‍ പ്രഞ്ജാപ്രവാഹ് ദേശിയ സംയോജകന്‍ ജെ.നന്ദകുമാര്‍ ‘ഭാരതത്തിന്റെ ജ്ഞാനപാരമ്പര്യം അഭിനവഗുപ്തന്‍ ജീവിതം – പാരമ്പര്യം എന്ന വിഷയം അവതരിപ്പിക്കും. വിവിധ ഭാഗങ്ങളില്‍ നിന്നായി 250ല്‍ അധികം പേര് പരിപാടിയില്‍ പങ്കാളികളായി.
