പഞ്ചവടിയില് സീതാരാമലക്ഷ്മണന്മാര് താമസിക്കുന്ന ആശ്രമത്തില് ഒരിക്കല് സുന്ദരിയായ ഒരു സ്ത്രീയെത്തി. രാമന്റെ മനോഹരമായ പാദങ്ങളുടെ കാല്പാടുകള് പിന്തുടര്ന്നാണ് അവള് അവിടെ എത്തിയത്. അവിടെ എത്തിയപ്പോള് സുന്ദരനായ രാമനെ കണ്ട് അവള് ഭ്രമിക്കുന്നു. ‘നീ ആരാണ്?’ എന്ന ചോദ്യത്തിന് രാവണ സോദരിയായ ശൂര്പ്പണഖ എന്ന് പറയുന്നു. അവള് തന്റെ ഇംഗിതം രാമനെ അറിയിക്കുന്നു. രാമന്, താന് ഭാര്യാസമേതനാണ് എന്ന് പറഞ്ഞു ലക്ഷ്മണന്റെ അടുത്തേക്ക് അയയ്ക്കുന്നു. ലക്ഷ്മണന് പറയുന്നു, ഞാന് രാമന്റെ ദാസനാണ്. എന്നോടൊപ്പം ചേര്ന്നാല് നീ ദാസിയായി ഇരിക്കേണ്ടിവരും എന്ന് പറഞ്ഞ് മടക്കി അയയ്ക്കുന്നു. വീണ്ടും രാമന്റെ അടുത്ത് എത്തുന്നു. രാമന് വീണ്ടും ലക്ഷ്മണന്റെ അടുത്തേക്ക് അയയ്ക്കുന്നു. ലക്ഷ്മണന് വീണ്ടും രാമന്റെ അടുത്തേക്ക് അയയ്ക്കുന്നു. ഇങ്ങനെ ഓരോരോ കാരണങ്ങള് പറഞ്ഞ് തുടര്ച്ചയായി അങ്ങോട്ടും ഇങ്ങോട്ടും അയയ്ക്കുമ്പോള് ശൂര്പ്പണഖ കോപാകുലയാകുന്നു. കോ
പാകുലയായ ശൂര്പ്പണഖ തന്റെ മനോഹര രൂപം വിട്ട് രാക്ഷസരൂപം പൂണ്ട് സീതയുടെ നേര്ക്ക് കുതിക്കുന്നു. രാമന് തടഞ്ഞു നിര്ത്താന് ശ്രമിക്കുമ്പോള് ലക്ഷ്മണന് വാളുകൊണ്ട് ശൂര്പ്പണഖയുടെ മൂക്കും മുലകളും ഛേദിക്കുന്നു. ശൂര്പ്പണഖ അവിടെനിന്നും ഓടിപ്പോകുന്നു. രാവണന്റെ വരവ് ഉടനെയുണ്ടാവുമെന്ന് രാമന് ലക്ഷ്മണനെ അറിയിക്കുന്നു.
ഇവിടെ ശൂര്പ്പണഖ ഒരു പ്രതീകമാണ്. തന്റെ ആഗ്രഹനിവര്ത്തിയ്ക്കായി ഏത് അധര്മ്മപ്രവൃത്തിയും ചെയ്യാന് തയ്യാറാകുന്ന ഒരാളിന്റെ പ്രതീകം. പുരുഷനാവട്ടെ, സ്ത്രീയാവട്ടെ താനുദ്ദേശിക്കുന്ന കാര്യം ആരില്നിന്നായാലും സാധിക്കണം എന്ന ചിന്ത മാത്രമായി. അപ്പോള് ധര്മ്മം മറന്നു. ധര്മ്മബോധം വെടിഞ്ഞ്, സ്വയം മറന്ന്, തെറ്റിന്റെ പാതയിലേക്ക്, അക്രമത്തിന്റെ പാതയിലേക്ക് നീങ്ങുന്നു. അങ്ങനെയുള്ളവര്ക്ക് ഉചിതമായ ശിക്ഷ ലഭിക്കും എന്ന സൂചനയാണ് നാം ഈ കഥയിലൂടെ മനസ്സിലാക്കേണ്ടത്
പിഎന് ഭട്ടതിരി
