അടിമാലി: അടിമാലിയിലെ സ്വകാര്യ ലോഡ്ജിന്റെ മുകളില്‍ നിന്ന് കഞ്ചാവ് ചെടികള്‍ കണ്ടെത്തി. അടിമാലി നാര്‍കോട്ടിക് എന്‍ഫോഴ്സ്മെന്റ് സ്‌ക്വാഡ് ടൗണില്‍ നടത്തിയ റെയ്ഡിലാണ് ചെടികള്‍ കണ്ടെത്തിയത്.
ലൈബ്രറി റോഡിന് സമീപമുള്ള ടൂറിസ്റ്റ് ഹോമിന് മുകളിലായി നട്ടുവളര്‍ത്തിയ നിലയില്‍ അഞ്ച് കഞ്ചാവ് ചെടികളാണ് ഉണ്ടായിരുന്നത്. ഉദ്ദേശം നാല് മാസത്തിലധികം പ്രായമുള്ളതും ആറടിയോളം ഉയരമുള്ളതുമാണ് കഞ്ചാവു ചെടികള്‍. എന്നാല്‍ നാല് മാസത്തിലധികമായി ലോഡ്ജില്‍ താമസക്കാരില്ലായിരുന്നു. സ്വന്തം ആവശ്യത്തിനായി ചെടികള്‍ നട്ടതാകാമെന്നും ലോക്ക് ഡൗണിന് മുമ്പായി നട്ടതാകമെന്നുമാണ് വിലിയിരുത്തല്‍.
ഒരുമാസത്തിനുശേഷം വിളവെടുക്കാന്‍ പാകമാകുന്നതാണ് ഈ ചെടികളെന്ന് ഉദ്യോഗസ്ഥര്‍ പറഞ്ഞു. കഞ്ചാവ് ചെടികള്‍ നട്ടുവളര്‍ത്തിയത് ആരാണെന്ന് അന്വേഷണം നടത്തി പ്രതികളെ പിടികൂടുന്നതാണെന്നും എക്സൈസ് ഉദ്യോഗസ്ഥര്‍ അറിയിച്ചു. എക്സൈസ് ഇന്‍സ്പെക്ടര്‍ വി.പി. അനൂപിന്റെ നേതൃത്വത്തില്‍ നടത്തിയ പരിശോധനയില്‍ ഉദ്യോഗസ്ഥരായ റ്റി.വി. സതീഷ്, മീരാന്‍ കെ.എസ്, ഖാലിദ് പി.എം, സാന്റി തോമസ് എന്നിവര്‍ പങ്കെടുത്തു.
