ന്യൂദല്ഹി:കോവിഡ് 19 ന് ശേഷം ഇന്ത്യയില് കായികമത്സരങ്ങള് പുനരാരംഭിക്കുന്നത് സംബന്ധിച്ചും കോവിഡ് കാലഘട്ടത്തില് സംയോജിത കായിക നയം രൂപീകരിക്കുന്നതിലെ പങ്കാളിത്തം സംബന്ധിച്ചുമുള്ള ആശയങ്ങള് കേന്ദ്ര യുവജന കായികമന്ത്രി കിരണ് റിജിജു കോമണ്വെല്ത്ത് മന്ത്രിതല ഫോറത്തില് പങ്കുവെച്ചു.എല്ലാ കോമണ്വെല്ത്ത് രാജ്യങ്ങളുടെയും പങ്കാളിത്തത്തോടെ നടന്ന ആഗോള ഫോറത്തില് വീഡിയോ കോണ്ഫറന്സിലൂടെയാണ് അദ്ദേഹം പങ്കെടുത്തത്. കോമണ്വെല്ത്ത് രാജ്യങ്ങളുടെ അംഗങ്ങളെന്ന നിലയില് എല്ലാ പ്രശ്നങ്ങളിലും പ്രത്യേകിച്ച്, ഇതുപോലെ ഒരു കാലഘട്ടത്തില്, നാം ഒറ്റക്കെട്ടായി നില്ക്കണം എന്ന് റിജിജു അഭിപ്രായപ്പെട്ടു.
മഹാമാരി കാലത്ത് പൗരന്മാര് ആരോഗ്യമുള്ളവരായിരിക്കുന്നതിന്റെ പ്രാധാന്യം ചൂണ്ടിക്കാട്ടിയ അദ്ദേഹം, ഇന്ത്യയില് കഴിഞ്ഞ വര്ഷം പ്രധാനമന്ത്രി നരേന്ദ്രമോദി ഉദ്ഘാടനം ചെയ്ത’ഫിറ്റ് ഇന്ത്യ മുന്നേറ്റം’ ജനങ്ങളെ ആരോഗ്യം ഉള്ളവരും പ്രതിരോധശേഷിയുള്ളവരുമാക്കാന് സഹായിച്ചു എന്ന് പറഞ്ഞു. കോവിഡ് മഹാമാരിക്കെതിരായ പോരാട്ടത്തില് ഈ മുന്നേറ്റം സഹായകമായെന്നും അദ്ദേഹം അഭിപ്രായപ്പെട്ടു. കോവിഡ് കാലത്ത് ജനങ്ങള്ക്ക് ഫിറ്റ്നെസ് ബോധവല്ക്കരണം നല്കുന്നതിന് നിരവധി ഓണ്ലൈന് പരിപാടികളിലൂടെ കഴിഞ്ഞിട്ടുണ്ട്. എല്ലാ പ്രായത്തില് പെട്ടവര്ക്കും ഉള്ള ആരോഗ്യം, പോഷണം, വ്യായാമം എന്നിവയെപ്പറ്റിയുള്ള വിദഗ്ധ നിര്ദ്ദേശങ്ങള് ഈ പരിപാടിയിലൂടെ നല്കാനായി. കോമണ്വെല്ത്ത് സെക്രട്ടറി ജനറല് പട്രീഷ്യ സ്കോട്ട്ലന്ഡ് മഹാമാരിക്കെതിരായ പോരാട്ടത്തില് ഇന്ത്യ സ്വീകരിച്ച നിര്ണായക നടപടിയാണ് ഇതെന്ന് അഭിനന്ദിച്ചു. കായിക ഇനവുമായി ബന്ധപ്പെട്ട വൈവിധ്യത്തെ പറ്റിയും കായികതാരങ്ങള്ക്കും പരിശീലകര്ക്കും ഓണ്ലൈന് വഴി പരിശീലനവും നൈപുണ്യ വര്ദ്ധന കോഴ്സുകളും നല്കുന്നത് എങ്ങനെയെന്നുo റിജിജു വിശദമാക്കി
വിവിധ കായികവിഭാഗങ്ങളിലായി മത്സരങ്ങള് പുനരാരംഭിക്കുന്ന കാര്യം പരിഗണനയിലുണ്ടെന്നും സെപ്റ്റംബറിലോ ഒക്ടോബറിലോ ഇന്ത്യയില് കായികമത്സരങ്ങള് പുനരാരംഭിക്കാന് കഴിയുമെന്നാണ് പ്രതീക്ഷിക്കുന്നതെന്നും അദ്ദേഹം കൂട്ടിച്ചേര്ത്തു. കോവിഡ് പ്രതിരോധ പോരാട്ടത്തില് യുവജനക്ഷേമ മന്ത്രാലയത്തിന് കീഴിലെ യുവ സന്നദ്ധസേവകരുടെ സംഭാവനകളും അദ്ദേഹം പങ്കുവെച്ചു.
