കോഴിക്കാട്: ജീവന് ഭീഷണി ഉയര്‍ത്തി കുന്ദമംഗലം മുപ്രക്കുന്ന് ഹരിജന്‍ കോളനിയില്‍ മണ്ണെടുക്കുന്നതിനെതിരെ സംസ്ഥാന മനുഷ്യാവകാശ കമ്മീഷന്‍ റിപ്പോര്‍ട്ട് ആവശ്യപ്പെട്ടു. ജില്ലാ കളക്ടര്‍, കുന്ദമംഗലം പഞ്ചായത്ത് സെക്രട്ടറി എന്നിവര്‍ പരാതിയെ കുറിച്ച് അന്വേഷിച്ച് 30 ദിവസത്തിനകം റിപ്പോര്‍ട്ട് സമര്‍പ്പിക്കണമെന്നാണ് കമ്മീഷന്‍ ജുഡീഷ്യല്‍ അംഗം പി. മോഹനദാസ് ആവശ്യപ്പെട്ടത്.
മുപ്പതടി ഉയരത്തിലാണ് മണ്ണെടുത്ത് യാതൊരു സുരക്ഷയുമില്ലാതെ കൂറ്റന്‍ കെട്ടിടം നിര്‍മ്മിക്കുന്നത്. ഇതിന് സമീപത്തുള്ള മുന്‍ ഓട്ടോ തൊഴിലാളി ബാബുവിന്റെ വീടിന്റെ അടുക്കള ഭാഗത്ത് വിള്ളലുണ്ടായി വീട് അപകടാവസ്ഥയിലാണ്. ബാബുവും കുടുംബവുമാണ് ഇവിടെ താമസിക്കുന്നത്. ബാബു ശാരീരിക ബുദ്ധിമുട്ട് അനുഭവിക്കുന്ന വ്യക്തിയാണ്.
കെട്ടിടം പണി നടക്കുന്നതിനാല്‍ മണ്ണെടുത്ത ഭാഗം സുരക്ഷിതമായി കെട്ടിയുറപ്പിക്കണമെന്ന് കെട്ടിടം ഉടമയോട് ബാബു ആവശ്യപ്പെട്ടെങ്കിലും യാതൊരു നടപടിയും ഉണ്ടായില്ല. മല ഇടിച്ചുനിരത്തി കെട്ടിടം നിര്‍മ്മിക്കുമ്പോള്‍ അപകടത്തിലാകുന്നത് നിരവധി കുടുംബങ്ങളാണ്. പഞ്ചായത്ത് ഇക്കാര്യത്തില്‍ നിശബ്ദത പാലിക്കുന്നതായി പരാതിയുണ്ട്.
