മുക്കം: മുക്കം മുത്തേരിയില്‍ ഓട്ടോയാത്രയ്ക്കിടെ 65 വയസുകാരിയെ ബോധരഹിതയാക്കി പീഡിപ്പിക്കുകയും കവര്‍ച്ച നടത്തുകയും ചെയ്ത സംഭവത്തില്‍ പോലീസ് അന്വേഷണം എങ്ങുമെത്തിയില്ല. സംഭവം നടന്ന് ഒരാഴ്ച പിന്നിട്ടിട്ടും ഓട്ടോറിക്ഷയോ പ്രതിയെയോ കണ്ടെത്താനാകാതെ പോലീസ് ഇരുട്ടില്‍ തപ്പുകയാണ്. അന്വേഷണത്തിന്റെ ഭാഗമായി പ്രദേശത്തെ സിസിടിവി ദൃശ്യങ്ങള്‍ പരിശോധിക്കുകയാണെന്നാണ് പോലീസ് പറയുന്നത്. അന്വേഷണം അന്യജില്ലകളിലേക്ക് വ്യാപിച്ചതായും പോലീസ് പറയുന്നുണ്ട്.
പീഡിപ്പിക്കപ്പെട്ടതായി വയോധിക പോലീസിനോട് നല്‍കിയ മൊഴിയില്‍ പറഞ്ഞ കാപ്പുമല പ്രദേശത്ത് സിസിടിവി കാമറയില്ല. മുത്തേരി അങ്ങാടിയില്‍ ഒരു സ്ഥാപനത്തിലുള്ള ക്യാമറ പ്രവര്‍ത്തിക്കുന്നുമില്ല. ഈ മാസം രണ്ടിന് രാവിലെ ആറരയോടെ ഓമശ്ശേരിയിലെ ഹോട്ടല്‍ ജീവനക്കാരിയായ വയോധിക ജോലിക്ക് പോകുന്നതിനായി മുത്തേരിയില്‍ നിന്ന് അതുവഴി വന്ന ഓട്ടോറിക്ഷയ്‌ക്ക് കൈ കാണിച്ച് കയറുകയായിരുന്നു.
അല്‍പ്പം മുന്നോട്ടുപോയശേഷം വയോധികയെ ബോധം കെടുത്തി തൊട്ടടുത്തുള്ള കാപ്പുമലയിലെ ആളൊഴിഞ്ഞപറമ്പില്‍ കൊണ്ടുപോയി കയ്യും കാലും കെട്ടിയിട്ട് പീഡിപ്പിക്കുകയായിരുന്നുവെന്ന് വയോധിക പോലീസിന് നല്‍കിയ മൊഴിയില്‍ പറയുന്നുണ്ട്. ശരീരമാകെ പരിക്കുകളോടെ വയോധിക കോഴിക്കോട് ഗവ. മെഡിക്കല്‍ കോളേജ് ആശുപത്രിയില്‍ ചികിത്സയിലാണ്. ഇവരുടെ സ്വര്‍ണമാലയും കമ്മലും പണമടങ്ങിയ പേഴ്‌സും കവര്‍ന്നാണ് കടന്നു കളഞ്ഞത്.
