കോഴിക്കോട്: സ്വര്‍ണക്കടത്തുമായി മുഖ്യമന്ത്രിയുടെ ഓഫീസിന് ബന്ധമുണ്ടെന്നാരോപിച്ചും ഐടി വകുപ്പ് സെക്രട്ടറി ശിവശങ്കരനെ പുറത്താക്കണമെന്നും ആവശ്യപ്പെട്ട് യുവമോര്‍ച്ച കോഴിക്കോട് സിറ്റി പോലീസ് കമ്മീഷണര്‍ ഓഫീസിലേക്ക് മാര്‍ച്ച് നടത്തി. യുവമോര്‍ച്ച സംസ്ഥാന അദ്ധ്യക്ഷന്‍ സി.ആര്‍. പ്രഫുല്‍ കൃഷ്ണന് ഉദ്ഘാടനം ചെയ്തു.
കേരളത്തില്‍ ഈയിടെ ഉണ്ടായ എല്ലാ അഴിമതികള്‍ക്കും മുഖ്യമന്ത്രിയുടെ ഓഫീസ് ചുക്കാന്‍ പിടിക്കുകയാണെന്ന് അദ്ദേഹം ആരോപിച്ചു. സ്വര്‍ണകള്ളക്കടത്ത് കേസുമായി ബന്ധപ്പെട്ട് മുഖ്യമന്ത്രിയുടെ ഓഫീസ് തന്നെ നേരിട്ട് ഇടപെട്ടു എന്നത് അതീവ ഗൗരവത്തോടെ കാണണം. നയതന്ത്ര ബന്ധങ്ങള്‍ ദുരുപയോഗപ്പെടുത്തി വലിയ കള്ളക്കടത്തിന് നേതൃത്വം നല്‍കിയ സംഭവം കേന്ദ്ര ഏജന്‍സികള്‍ അന്വേഷിക്കണം. ഐടി വകുപ്പ് സെക്രട്ടറി ശിവശങ്കരനെ പുറത്താക്കണമെന്നും അദ്ദേഹം ആവശ്യപ്പെട്ടു. സംസ്ഥാന ജനറല്‍ സെക്രട്ടറി കെ. ഗണേഷ്, ജില്ലാ വൈസ് പ്രസിഡന്റ് ലിബിന്‍ ഭാസ്്കര്‍ എന്നിവര്‍ സംസാരിച്ചു. വിഷ്ണു പയ്യാനക്കല്‍, വിനീഷ് നെല്ലിക്കോട്, കെ. ജിതിന്‍, എ. സരൂപ് എന്നിവര്‍ നേതൃത്വം നല്‍കി.
