തളിപ്പറമ്പ്: നിരോധിച്ച നോട്ടുകൾക്ക് പകരം പുതിയ കറൻസികൾ നൽകുമെന്ന പേരിൽ തട്ടിപ്പ് നടത്തുന്ന സംഘത്തെ ഇരയായവർ തട്ടിക്കൊണ്ടുപോയി അക്രമിച്ച് പണവും സ്വര്ണ്ണാഭരണങ്ങളും തട്ടിയെടുത്തതായി പരാതി. പരിയാരം ഇരിങ്ങലിലെ ഒരു വീട്ടില് പൂട്ടിയിട്ട നിലയിൽ പൊലീസ് കണ്ടെത്തിയ അന്യ സംസ്ഥാനക്കാരായ മൂന്നുപേരാണ് പരിയാരം പൊലീസിന് പരാതി നൽകി. ഈ വീട്ടിൽ നിന്നും രണ്ട് കഞ്ചാവും പിടികൂടിയിരുന്നു. അതേസമയം, സംഭവത്തിൽ ദുരൂഹതയുള്ളതിനാൽ പരിയാരം സിഐ കെ വി ബാബു, എസ് ഐ എം പി ഷാജി എന്നിവരുടെ നേതൃത്വത്തിൽ പൊലീസ് അന്വേഷണം തുടങ്ങി.
ദുരൂഹത നീങ്ങിയതിന് ശേഷം കേസെടുക്കാമെന്ന നിലപാടിലാണ് പൊലീസ്. ഞായറാഴ്ച്ച സന്ധ്യയോടെയാണ് പരാതിക്ക് അടിസ്ഥാനമായ സംഭവങ്ങളുടെ തുടക്കമെന്ന് പൊലീസ് പറയുന്നു. നിരോധിച്ച 500, 1000 രൂപ നോട്ടുകൾക്ക് പകരം പുതിയ നോട്ടുകള് വാഗ്ദാനം ചെയ്ത് തട്ടിപ്പ് നടത്തുന്ന സംഘം രാജസ്ഥാനിലെ അജ്മീര് കേന്ദ്രമായി പ്രവര്ത്തിക്കുന്നുണ്ട്. ഈ സംഘത്തിലുള്ളവരാണ് പരാതിക്കാരെന്ന പ്രാഥമിക നിഗമനത്തിലാണ് പൊലീസ്.
ഈ തട്ടിപ്പ് സംഘത്തിന് കേരളത്തിന്റെ പല ഭാഗത്തും ഏജന്റുമാരുണ്ട്. പഴയ നോട്ടുകള് കൈവശമുള്ളവരെ ഇവരാണ് കണ്ടെത്തി തലവന് വിവരം നൽകുന്നത്. തുടർന്ന് മറ്റൊരു സംഘമെത്തി പരിശോധിച്ച ശേഷം നിരോധിത നോട്ടുകൾ അയച്ചു കൊടുക്കാൻ നിർദ്ദേശിച്ചു. ഇങ്ങനെ പണം അയച്ചു കഴിഞ്ഞാല് തന്ത്രപൂർവ്വം സംഘം ഒഴിഞ്ഞുമാറുകയാണ് ചെയ്യുന്നത്. അത്തരത്തിലുള്ള ഒരു ഇടപാട് നടത്താനുണ്ടെന്ന് വിശ്വസിപ്പിച്ചാണ് പരാതിക്കാരായ അന്യ സംസ്ഥാന സംഘത്തെ പരിയാരത്തേക്ക് വിളിച്ചു വരുത്തിയതെന്ന് പൊലീസ് വ്യക്തമാക്കുന്നു.
ഞായറാഴ്ച സന്ധ്യയോടെ ഗോവ വഴി കണ്ണവത്തെത്തിയ അഞ്ചംഗ സംഘത്തെ കാറില് തട്ടിക്കൊണ്ടുപോയി മര്ദിച്ച് പണവും അവരുടെ കൈവശമുണ്ടായിരുന്ന സ്വര്ണ്ണാഭരണങ്ങളും കൈക്കലാക്കിയെന്നാണ് പരാതി. 60,000 രൂപയും രണ്ട് സ്വര്ണ്ണമാലകളും ഒരു എടിഎം കാര്ഡും അക്രമി സംഘം കൈക്കലാക്കിയെന്നും ഇതിൽ പറയുന്നു. പിന്നീട് കണ്ണൂരില് കൊണ്ടുപോയി എടിഎമ്മില് നിന്ന് 9,000 രൂപ പിൻവലിപ്പിച്ചു അതും തട്ടിയെടുത്തു. തുടര്ന്ന് ഇരിങ്ങലിലെ ഒരു വീട്ടിൽ തടങ്കലിലാക്കുകയായിരുന്നു എന്നാണ് ഇവർ പൊലീസിനോട് പറഞ്ഞത്.
അഞ്ചംഗ സംഘം വീട്ടിലെത്തും മുമ്പ് ആ കാറില് നിന്ന് ഒരാള് പുറത്തുചാടിയിരുന്നു. ഇക്കാര്യം ശ്രദ്ധയില്പ്പെട്ട നാട്ടുകാരില് ചിലര് വിവരം പോലീസില് അറിയിക്കുകയായിരുന്നു. തുടർന്ന് നടത്തിയ തെരച്ചിലില് മുംബൈ കുലാവയിലെ ഓംരാജ്, കല്യാണിലെ സമാധാന്, ഗുജറാത്ത് അഹമ്മദാബാദിലെ അഷ്മിന് എന്നിവരെ മോചിപ്പിക്കുകയായിരുന്നു. അതിനിടയില് രണ്ടുപേര് ഓടിരക്ഷപ്പെട്ടു. കര്ണ്ണാടക ബെല്ഗാമിലെ സഞ്ജയ്, മുംബൈയിലെ സതീഷ് എന്നിവരാണ് ഓടിരക്ഷപ്പെട്ടതെന്ന് തെളിഞ്ഞിട്ടുണ്ട്. ഇവരെ അക്രമിച്ചുവെന്ന് സംശയിക്കുന്ന സംഘത്തിലുള്ള കാഞ്ഞങ്ങാട് ആവിക്കര സ്വദേശിയെ പൊലീസ് അറസ്റ്റ് കസ്റ്റഡിയിൽ എടുത്തിട്ടുണ്ട്.
ഇരിങ്ങലിലെ വീട്ടിൽ നിന്നും രണ്ട് കിലോ കഞ്ചാവും പൊലീസ് പിടികൂടിയിട്ടുണ്ട്. അന്യ സംസ്ഥാനക്കാരെ കൊണ്ടു പോകാൻ ഉപയോഗിച്ച ഒരു കാറും രണ്ട് ബൈക്കുകളും കസ്റ്റഡിയിലെടുത്തു. അക്രമി സംഘത്തില് ഒമ്പതുപേരുണ്ടായിരുന്നുവെന്നാണ് സൂചന. ഇതുൾപ്പെടെ സംഭവത്തിലെ എല്ലാ ദുരൂഹതകളും നീക്കാനാണ് പൊലീസ് വിശദമായ അന്വേഷണം തുടങ്ങിയത്.
ജന്മഭൂമി ഓണ്ലൈന്