ന്യൂദല്‍ഹി: ദല്‍ഹിയിലെ ഹിന്ദു വിരുദ്ധ കലാപത്തിന് ഫണ്ട് ചെയ്തത് ഇസ്ലാമിക ഭീകരനും മതപ്രഭാഷകനുമായി സക്കീര്‍ നായിക്ക് എന്ന് ദല്‍ഹി പോലീസ്. കലാപത്തിന്റെ ആസൂത്രണം നടത്തിയ താഹിര്‍ ഹുസൈന്‍, ഉമര്‍ ഖാലിദ് എന്നിവരുടെ അനുയായി ആയ ഖാലിദ് സെയ്ഫി ഫണ്ട് ശേഖരണത്തിനായി മലേഷ്യയില്‍ പോയി സക്കീറിനെ നേരിട്ട് കണ്ടെന്നും ദല്‍ഹി പോലീസിന്റെ റിപ്പോര്‍ട്ടില്‍ വ്യക്തമാക്കുന്നു. സക്കീര്‍ മാത്രമല്ല, സിംഗപ്പൂരില്‍ പ്രവര്‍ത്തിക്കുന്ന ഒരു ഇന്ത്യക്കാരനും കലാപത്തിനായി ഫണ്ട് നല്‍കിയിട്ടുണ്ട്. ഉമര്‍ ഖാലിദും സുഹൃത്തും ചേര്‍ന്ന് നടത്തുന്ന എന്‍ജിഒയുടെ അക്കൗണ്ട് വഴിയാണ് ഫണ്ട് ട്രാന്‍സ്ഫര്‍ ചെയ്തത്. നേരത്തേ, ചാന്ദ്ബാഗിലെ അക്രമങ്ങളുടെ പേരില്‍ സെയ്ഫിയെ പോലീസ് അറസ്റ്റ് ചെയ്തിരുന്നു. ഇതേത്തുടര്‍ന്ന് സെയ്ഫിയുടെ ഫോണ്‍ രേഖകളുടെ വിശദമായ അന്വേഷണത്തിലാണ് സക്കീറുമായുള്ള ബന്ധം വ്യക്തമാകുന്നത്.
ദല്‍ഹി കലാപത്തിന് വിദേശപണം ലഭിച്ചതായി കേന്ദ്ര ആഭ്യന്തര മന്ത്രി അമിത് ഷാ നേരത്തേ രാജ്യസഭയില്‍ വ്യക്തമാക്കിയിരുന്നു. ആരാണ് പണം ഒഴുക്കിയതെന്ന് ഉടന്‍ കണ്ടെത്തുമെന്നും അദ്ദേഹം പ്രഖ്യാപിച്ചിരുന്നു.
വടക്കുകിഴക്കന്‍ ദല്‍ഹിയില്‍ ഫെബ്രുവരിയില്‍ നടന്ന വര്‍ഗീയ കലാപവുമായി ബന്ധപ്പെട്ട് ദല്‍ഹി പോലീസ് പുതിയ കുറ്റപത്രങ്ങള്‍ കൂടി കോടതിയില്‍ സമര്‍പ്പിച്ചിരുന്നു. ഗുതുരതമായ കണ്ടെത്തലുകളാണ് കുറ്റപത്രത്തില്‍ ഉള്‍പ്പെട്ടിരിന്നത്. മുസ്ലിം മതമൗലികവാദികളുടെ ഒരു സംഘം ഹിന്ദുക്കളെ ലക്ഷ്യമിട്ട് നടത്തിയത് അതിക്രൂര ആക്രമണമെന്ന് കുറ്റപത്രത്തില്‍ വ്യക്തമാക്കുന്നു. ദില്‍ബര്‍ നേഗി എന്ന യുവാവിനെ വാളുപയോഗിച്ച് വെട്ടിയ ശേഷം ജീവനോടെ കത്തിക്കുകയായിരുന്നെന്ന് കുറ്റപത്രത്തില്‍ വ്യക്തമാക്കുന്നു. മധുരങ്ങള്‍ വില്‍ക്കുന്ന അനില്‍ സ്വീറ്റ്‌സ് കടയ്‌ക്കുള്ളില്‍ ജോലി ചെയ്തു കൊണ്ടു നിന്നപ്പോഴാണ് ഹിന്ദുക്കളുടെ സ്ഥാപനങ്ങള്‍ ലക്ഷ്യമിട്ട് അക്രമകാരികള്‍ എത്തിയത്. അവിടെവച്ചാണ് നേഗിയെ കൊല്ലുന്നതും.
ഡിആര്‍പി കോണ്‍വെന്റ് സ്‌കൂളില്‍നിന്ന് ജനക്കൂട്ടം കമ്പ്യൂട്ടറുകളും മറ്റ് വിലപിടിപ്പുള്ള വസ്തുക്കളും കൊള്ളയടിച്ചു, റോഡിന്റെ മറുവശത്ത് രാജധാനി സ്‌കൂളിന് മുന്നിലുള്ള അനില്‍ സ്വീറ്റ്സിന്റെ കെട്ടിടം അഗ്നിക്കിരയാക്കി. കടയ്‌ക്കകത്ത് കുടുങ്ങിയിരുന്ന ജോലിക്കാരനായ ദില്‍ബാര്‍ നേഗിയുടെ കത്തിക്കരിഞ്ഞ മൃതദേഹം പിന്നീട് പോലീസ് കണ്ടെത്തി തുടങ്ങിയ കാര്യങ്ങളും കുറ്റപത്രത്തിലുണ്ട്. ഐ.ബി ഉദ്യോഗസ്ഥന്‍ അങ്കിത് ശര്‍മയെ കൊലപ്പെടുത്തിയതുമായും ശിവ്വിഹാറിലെ രാജധാനി സ്‌കൂളിന് സമീപം നടന്ന അക്രമങ്ങളുമായും ബന്ധപ്പെട്ട് രണ്ട് വീതം കുറ്റപത്രങ്ങളും അന്വേഷണസംഘം സമര്‍പ്പിച്ചിരുന്നു. ഇതിനു ശേഷം നടന്ന അന്വേഷണത്തിലാണ് സക്കീര്‍ നായിക്കിന്റെ പങ്കും വ്യക്തമാകുന്നത്.
