തൊടുപുഴ: കഴിഞ്ഞ നാല് ദിവസത്തിനിടെ 55 പ്രവാസികള്‍ കൂടി ഇടുക്കിയിലേക്ക് മടങ്ങിയെത്തി. ഒമ്പത് രാജ്യങ്ങളില്‍ നിന്നായി 27 പുരുഷന്മാരും 28 സ്ത്രീകളുമാണ് കൊച്ചി, തിരുവനന്തപുരം, കോഴിക്കോട് എയര്‍പോര്‍ട്ടുകള്‍ വഴി നാട്ടിലേക്ക് മടങ്ങിയെത്തിയത്. ആരോഗ്യ പരിശോധനകള്‍ക്ക് ശേഷം ഇതില്‍ 38 പേരെ വീടുകളിലും 12 പേരെ പെയ്ഡ് ക്വാറന്റൈന്‍ സെന്ററിലും നാല് പേരെ സര്‍ക്കാര്‍ കോവിഡ് കെയര്‍ സെന്ററിലും നിരീക്ഷണത്തില്‍ പാര്‍പ്പിച്ചു.
ഒരാളെ യാത്രാമധ്യേയേ ശാരീരിക ക്ഷീണം അനുഭവപ്പെട്ടതിനെ തുടര്‍ന്ന് തൊടുപുഴയിലുള്ള ജില്ലാ ആശുപത്രിയില്‍ പ്രവേശിപ്പിച്ചു. നാട്ടിലെത്തിയവരുടെ എണ്ണം താലൂക്ക് അടിസ്ഥാനത്തില്‍: തൊടുപുഴ – 22, ദേവികുളം- 2, ഇടുക്കി- 5, ഉടുമ്പന്‍ചോല- 17, പീരുമേട്- 6. ഇതുകൂടാതെ കാഞ്ഞിരപ്പള്ളി താലൂക്കിലെ രണ്ട് പേരും കൊട്ടാരക്കര താലൂക്കിലെ ഒരാളും ഇടുക്കിയിലേക്കാണെത്തിയത്.
ദുബായില്‍ നിന്ന് ആറ് പുരുഷന്മാരും ആറ് സ്ത്രീകളുമടക്കം 12 പേരാണെത്തിയത്. ഇതില്‍ എട്ട് പേരെ വീടുകളിലും രണ്ട് പേരെ മുട്ടത്തെയും നെടുങ്കണ്ടത്തെയും പെയ്ഡ് ക്വാറന്റൈന്‍ സെന്ററുകളിലും രണ്ട് പേരെ പെരുമ്പള്ളിച്ചിറയിലെ സര്‍ക്കാര്‍ കോവിഡ് കെയര്‍ സെന്ററിലും നിരീക്ഷണത്തിലാക്കി.
റിയാദില്‍ നിന്ന് 10 സ്ത്രീകളും മൂന്ന് പുരുഷന്മാരും ഉള്‍പ്പെടെ 13 പേരാണെത്തിയത്. ഇതില്‍ 12 പേരെ വീടുകളിലും ഒരാളെ നെടുങ്കണ്ടത്തെ പെയ്ഡ് ക്വാറന്റൈന്‍ സെന്ററിലും പ്രവേശിപ്പിച്ചു.
അബുദാബിയില്‍ നിന്ന് ഒരു പുരുഷനാണെത്തിയത്. ഇയ്യാളെ വീട്ടില്‍ നിരീക്ഷണത്തിലാക്കി. സിംഗപ്പൂരില്‍ നിന്ന് ഒരു വനിതയാണെത്തിയത്. ഇവരെ പീരുമേട് മലങ്കര ചര്‍ച്ചിലെ സര്‍ക്കാര്‍ കോവിഡ് കെയര്‍ സെന്ററിലാക്കി.
മാലി ദീപില്‍ നിന്നും ഒമ്പത് പുരുഷന്മാരും രണ്ട് സ്ത്രീകളുമടക്കം 11 പേരാണെത്തിയത്. ഇതില്‍ ആറ് പേരെ വീടുകളിലും അഞ്ച് പേരെ മുട്ടം, കുരുവിള സിറ്റി, മറയൂര്‍ എന്നിവിടങ്ങളിലെ പെയ്ഡ് ക്വാറന്റൈന്‍ സെന്ററുകളിലും നിരീക്ഷണത്തില്‍ പ്രവേശിപ്പിച്ചു.
ഖത്തറില്‍ നിന്നും മൂന്ന് പുരുഷന്മാരും ആറ് സ്ത്രീകളുമടക്കം ഒമ്പത് പേരാണെത്തിയത്. ഇതില്‍ എട്ട് പേരെ വീടുകളിലും ഒരാളെ മുട്ടത്തെ പെയ്ഡ് ക്വാറന്റൈന്‍ സെന്ററിലും നിരീക്ഷണത്തിലാക്കി.
യുഎഇ (റാസല്‍ഖൈമ) യില്‍ നിന്ന് രണ്ട് പുരുഷന്മാരും ഒരു സ്ത്രീയുമടക്കം മൂന്ന് പേരാണെത്തിയത്. ഇതില്‍ ഒരാളെ വീട്ടിലും മറ്റ് രണ്ട് പേരെ മുട്ടം, ചാറ്റുപാറ എന്നിവിടങ്ങളിലെ പെയ്ഡ് ക്വാറന്റൈന്‍ സെന്ററുകളിലും നിരീക്ഷണത്തിലാക്കി. മസ്‌ക്കറ്റില്‍ നിന്ന് രണ്ട് പുരുഷന്മാരും രണ്ട് സ്ത്രീകളുമടക്കം നാല് പേരാണെത്തിയത്. ഇതില്‍ ഒരാളെ യാത്രാമധ്യേ ശാരീരിക ക്ഷീണം അനുഭവപ്പെട്ടതിനെ തുടര്‍ന്ന് തൊടുപുഴയിലുള്ള ജില്ലാ ആശുപത്രിയിലും ഒരാളെ വീട്ടിലും ഒരാളെ പെരുമ്പള്ളിച്ചിറയിലെ സര്‍ക്കാര്‍ കോവിഡ് കെയര്‍ സെന്ററിലും ഒരാളെ മുട്ടത്തെ പെയ്ഡ് ക്വാറന്റൈന്‍ സെന്ററിലും നിരീക്ഷണത്തില്‍ പാര്‍പ്പിച്ചു. ബഹ്‌റിനില്‍ നിന്നുമെത്തിയ പുരുഷനെ വീട്ടില്‍ നിരീക്ഷണത്തിലാക്കി.
