കൊട്ടാരക്കര: പോലീസ് പുതുതായി പുറത്തിറക്കിയ പോള്-ആപ്പിന് കൊല്ലം റൂറല് മേഖലയില് വന് സ്വീകാര്യത ലഭിച്ചതായി കൊല്ലം റൂറല് ജില്ലാ പോലീസ് മേധാവി എസ്. ഹരിശങ്കര് അറിയിച്ചു. പോള്ആപ്പ് ഇതിനകം ഒരുലക്ഷത്തില് അധികംപേര് ഡൗണ്ലോഡ് ചെയ്തുകഴിഞ്ഞു.
സാധാരണക്കാര്ക്ക് വളരെയെളുപ്പം ഉപയോഗിക്കാന് പറ്റുന്ന രീതിയിലാണ് ആപ്പ് തയ്യാറാക്കിയിരിക്കുന്നത്. ഉപയോഗിക്കുന്ന വ്യക്തി നില്ക്കുന്ന സ്ഥലം മനസ്സിലാക്കി ഏറ്റവും അടുത്ത പോലീസ് സ്റ്റേഷന് സൂചിപ്പിക്കാന് ഈ ആപ്പിലൂടെ പോലീസിന് കഴിയും. കേരളാ പോലീസിലെ എല്ലാ റാങ്കിലെ ഉദ്യോഗസ്ഥരുടെയും ഫോണ് നമ്പര്, ഇ-മെയില് വിലാസം തുടങ്ങിയവ ലഭ്യമാണ്. പ്രഥമവിവര റിപ്പോര്ട്ട് ഡൗണ്ലോഡ് ചെയ്യാം. പോലീസ് മുഖേന ലഭിക്കുന്ന വിവിധ സേവനങ്ങള്ക്കുള്ള ഫീസ് ട്രഷറിയിലേക്ക് അടയ്ക്കാനും ഉപയോഗിക്കാം. പാസ്സ്പോര്ട്ട് പരിശോധനയുടെ നിലവിലെ അവസ്ഥ അറിയാനും മുതിര്ന്ന പൗരന്മാര്ക്ക് ആവശ്യമായ ജനമൈത്രി സേവനങ്ങള് ലഭിക്കാനായി രജിസ്റ്റര് ചെയ്യാനും കഴിയും.
സ്ത്രീകളുടെയും കുട്ടികളുടെയും സുരക്ഷയ്ക്കായി ആപ്പില് പ്രത്യേകം സംവിധാനം ഏര്പ്പെടുത്തിയിട്ടുണ്ട്. നേരത്തെ രജിസ്റ്റര് ചെയ്ത മൂന്ന് മൊബൈല് നമ്പറിലേക്ക് ആപ്പ് ഉപയോഗിക്കുന്നയാളുടെ ലൊക്കേഷന് അയയ്ക്കാന് കഴിയും. അത്യാവശ്യഘട്ടങ്ങളില് ഈ നമ്പറുകളിലേക്ക് എസ്ഒഎസ് കാള് ചെയ്യാനും സാധിക്കും. സ്റ്റേഷന് ഹൗസ് ഓഫീസറുമായി കൂടിക്കാഴ്ച്ചയ്ക്ക് സമയം നിശ്ചയിക്കാനും ഈ ആപ്പ് മുഖേന സാധിക്കും.
പോലീസ് എമര്ജന്സി റെസ്പോണ്സ് സപ്പോര്ട്ട്സ് സിസ്റ്റത്തിലേക്ക് സേവനം ആവശ്യപ്പെട്ടുകൊണ്ട് സന്ദേശം അയയ്ക്കാന് പ്രത്യേകം സംവിധാനമുണ്ട്. വീടുപൂട്ടി പോകുന്ന അവസരങ്ങളില് അക്കാര്യം ബന്ധപ്പെട്ട സ്റ്റേഷനില് അറിയിക്കാനും ഇതുപയോഗിക്കാം. പോലീസിന്റെ എല്ലാ സോഷ്യല് മീഡിയ പേജുകളും ഇതില് ലഭിക്കും. ട്രാഫിക് നിയമങ്ങള് പഠിപ്പിക്കുന്ന ട്രാഫിക് ഗുരു, യാത്രകള്ക്ക് ഉപകാരമായ ടൂറിസ്റ്റ് ഗൈഡ്, സൈബര് മേഖലയിലെ തട്ടിപ്പുകള് തടയാനുള്ള നിര്ദ്ദേശങ്ങള്, പ്രധാനപ്പെട്ട സര്ക്കാര് വെബ് സൈറ്റുകളുടെ ലിങ്കുകള് എന്നിവയും ആപ്പില് ലഭ്യമാണ്.
ചില വിഭാഗങ്ങളില്പ്പെട്ട കുറ്റകൃത്യങ്ങളുടെ വിവരണവും ഫോട്ടോയും നേരിട്ട് പോലീസിന് അയയ്ക്കാന് ഈ ആപ്പിലൂടെ പൊതുജനങള്ക്ക് സൗകര്യമൊരുക്കിയിട്ടുണ്ട്. ഉപേക്ഷിക്കപ്പെട്ട നിലയില് കാണപ്പെടുന്ന സ്ത്രീകളുടെയും കുട്ടികളുടെയും മുതിര്ന്നപൗരന്മാരുടെയും വിവരങ്ങള് അവരുടെ ഫോട്ടോ ജിയോ ടാഗ് ചെയ്ത് പോലീസിന് നല്കാം. പോലീസ് സ്റ്റേഷന് സന്ദര്ശിക്കുന്നവര്ക്ക് തങ്ങളുടെ അനുഭവങ്ങള് വിവരിക്കാനും സൗകര്യമൊരുക്കിയിട്ടുണ്ട്. കൂടുതല് ആളുകള് ഈ സേവനം പ്രയോജനപ്പെടുത്തണമെന്ന് കൊല്ലം റൂറല് ജില്ലാ പോലീസ് മേധാവി അറിയിച്ചു.
