തിരുവനന്തപുരം: ജീവിതകാലം മുഴുവന് അന്യ രാജ്യങ്ങളില് പോയി കേരളത്തിനു വേണ്ടി കഷ്ടപ്പെടുന്ന പ്രവാസികളെ അവഹേളിക്കുകയും അപമാനിക്കുകയും ചെയ്യുന്ന സമീപനമാണ് സംസ്ഥാന സര്ക്കാര് തുടരുന്നതെന്ന് ബിജെപി സംസ്ഥാന അധ്യക്ഷന് കെ.സുരേന്ദ്രന്. കേരളത്തില് ഇതര സംസ്ഥാന തൊഴിലാളികള്ക്ക് നല്കിയ സൗകര്യങ്ങള് പോലും പ്രവാസികള്ക്ക് നല്കാനാകില്ലന്ന് ധ്വനിപ്പിക്കുന്നതാണ് നോര്ക്ക സെക്രട്ടറി ഇറക്കിയ ഉത്തരവെന്ന് സുരേന്ദ്രന് പ്രസ്താവനയില് പറഞ്ഞു.
അതിഥി തൊഴിലാളികളായി പോലും പ്രവാസികളെ പരിഗണിക്കാനാകില്ലന്ന നോര്ക്ക സെക്രട്ടറിയുടെ ഉത്തരവ് അടിയന്തിരമായി പിന്വലിക്കണമെന്ന് സുരേന്ദ്രന് ആവശ്യപ്പെട്ടു. കേരളത്തില് എന്തു പ്രതിസന്ധി വന്നാലും പണം പിരിക്കാനായി പ്രവാസികള്ക്കരികിലേക്ക് ഓടിക്കൊണ്ടിരുന്നവരാണ് ഇപ്പോള് അവരെയാകെ കയ്യൊഴിയുന്ന സമീപനം സ്വീകരിക്കുന്നത്. വിദേശത്ത് നിന്നു വരുന്നവരില് ചെറിയ ശതമാനത്തിന് മാത്രമാണ് രോഗമുള്ളത്. അവരെ തന്നെ മെച്ചപ്പെട്ട സൗകര്യങ്ങളോടെ നിരീക്ഷണത്തില് വച്ചാല് വ്യാപനം തടയുകയുമാകാം. അതൊന്നും ചെയ്യാതെ പ്രവാസികളെ മരണത്തിനു് വിട്ടുകൊടുക്കാം എന്ന മുഖ്യമന്ത്രി പിണറായി വിജയന്റെ സമീപനം നന്ദികേടും ക്രൂരതയുമാണ്.വിദേശത്ത് കോവിഡ് ടെസ്റ്റ് നടത്തി രോഗമില്ലാത്തവരെ മാത്രം കൊണ്ടുവരിക എന്നത് പ്രായോഗികമല്ലന്ന് മുഖ്യമന്ത്രിക്കും അറിയാം. ഇവിടെ സൗകര്യങ്ങള് ഒരുക്കുന്നതില് പരാജയപ്പെട്ടതിന്റെ ജാള്യത മറയ്ക്കാനാണ് നിബന്ധനകള് വച്ച് പ്രവാസികളുടെ യാത്ര തടസപ്പെടുത്താന് ശ്രമിക്കുന്നത്.രോഗമുള്ള പ്രവാസികളെ മുഴുവന് വിദേശത്ത് ഉപേക്ഷിക്കാം എന്ന സമീപനമാണ് പിണറായിക്ക്. പ്രളയത്തിനടക്കം പ്രവാസികളില് നിന്ന് കൈ നീട്ടി വാങ്ങിയ സഹായത്തിന്റെ കണക്കെങ്കിലും പിണറായി ഓര്ക്കണം. രോഗമുള്ള പ്രവാസികളെ കേരളത്തിലെത്തിച്ച് മെച്ചപ്പെട്ട ചികിത്സ നല്കണമെന്ന് സുരേന്ദ്രന് പറഞ്ഞു.
