തിരുവനന്തപുരം: സംസ്ഥാനത്ത് കൊറോ വൈറസ് ബാധിച്ച് ഒരു മരണം കൂടി റിപ്പോര്‍ട്ട് ചെയ്തു. രോഗം ബാധിച്ച് പരിയാരം മെഡിക്കല്‍ കോളേജില്‍ ചികിത്സയിലായിരുന്ന അക്‌സൈസ് ഉദ്യോഗസ്ഥനാണ് ഇന്ന് രാവിലെ മരിച്ചത്. ഇതോടെ സംസ്ഥാനത്ത് കൊറോണ ബാധിച്ച് മരിക്കുന്നവരുടെ എണ്ണം 21 ആയി.
പടിയൂര്‍ സ്വദേശി സുനില്‍കുമാറാണ് (28) ഇന്ന് മരണമടഞ്ഞത്. മുന്ന് ദിവസം മുമ്പാണ് ഇയാള്‍ക്ക് രോഗബാധ സ്ഥിരീകരിച്ചത്. തുടര്‍ന്ന് ന്യൂമോണിയ ബാധിക്കുകയും ബുധനാഴ്ച വൈകിട്ടോടെ ആരോഗ്യനില വഷളാവുകയായിരുന്നു. ഇന്ന് രാവിലെ വിദഗ്ധ സംഘമെത്തി സുനില്‍ കുമാറിനെ പരിശോധിച്ചെങ്കിലും ജീവന്‍ രക്ഷിക്കാനായില്ല.
മട്ടന്നൂര്‍ എക്സൈസ് ഓഫീസിലെ ജീവനക്കാരനാണ് സുനില്‍കുമാര്‍. ഇയാള്‍ക്ക് രോഗബാധ സ്ഥിരീകരിച്ചതിനെ തുടര്‍ന്ന് മട്ടന്നൂര്‍ എക്സൈസ് ഓഫീസ് അടയ്‌ക്കുകയും 18 ഓളം ജീവനക്കാര്‍ ക്വാറന്റൈനില്‍ പോവുകയും ചെയ്തിരുന്നു.
അതേസമയം സുനില്‍കുമാറിന് എവിടെവെച്ചാണ് കോവിഡ് ബാധയുണ്ടായത് എന്ന കാര്യം വ്യക്തമല്ല. കര്‍ണാടക മേഖലയില്‍നിന്ന് ലഹരിവസ്തുക്കളുമായി വന്ന പ്രതിയെ അറസ്റ്റ് ചെയ്യുകയും സുനില്‍ ഇയാള്‍ക്കൊപ്പം കണ്ണൂര്‍ ജില്ലാ ആശുപത്രിയില്‍ വൈദ്യപരിശോധനയ്‌ക്ക് കൊണ്ടുപോവുകയും ചെയ്തിരുന്നു. ആശുപത്രിയില്‍ വെച്ചോ പ്രതിയില്‍നിന്നോ ആവാം രോഗബാധയുണ്ടായത് എന്നാണ് ഇപ്പോള്‍ വിലയിരുത്തുന്നത്.
