കൊച്ചി: കഴിഞ്ഞ സീസണില് ബ്ലാസ്റ്റേഴ്സിന്റെ മധ്യനിരതാരമായിരുന്ന സാമുവല് ലാല്മുവാന്പുയ ക്ലബിനോട് വിടപറഞ്ഞു. 21 കാരനായ താരത്തിന്റെ പുതിയ തട്ടകം ഒഡീഷ എഫ്സിയാണ്. താരവുമായി രണ്ടുവര്ഷത്തെ കരാര് ഒപ്പിടുവെന്ന് ഒഡീഷ എഫ്സി ക്ലബ് അധികൃതര് അറിയിച്ചു. സന്ദേശ് ജിങ്കന് പുറമേ സാമുവലും ടീം വിടുന്നത് ബ്ലാസ്റ്റേഴ്സിന് കടുത്ത ക്ഷീണമായിരിക്കുമെന്നാണ് കരുതപ്പെടുന്നത്. ഏറെ പ്രതീക്ഷകളോടെ കഴിഞ്ഞ സീസണില് ബ്ലാസ്റ്റേഴ്സിലെത്തിയ താരത്തിന് കാര്യമായി അവസരം ലഭിച്ചിരുന്നില്ല. അഞ്ച് കളികളില് മാത്രമാണ് കളിക്കാന് പരിശീലകന് എല്കോ ഷട്ടോരി സാമുവലിന് അവസരം നല്കിയത്.
സീസണില് മൊത്തം കളത്തിലിറങ്ങിയതാകട്ടെ 59 മിനിറ്റ് മാത്ര. അറ്റാക്കിങ് മിഡ്ഫീല്ഡറായ സാമുവല് മിസോറാമില് നിന്നുള്ള താരമാണ്. 2015 മുതല് 2018 വരെ ഷില്ലോങ് ലജോങ് ടീമിന് വേണ്ടി കളിച്ചിരുന്ന താരം 2018-19 സീസണില് വായ്പാടിസ്ഥാനത്തില് മിനര്വ പഞ്ചാബിനായും ബൂട്ടുകെട്ടി. മിനര്വയില് നിന്നായിരുന്നു ബ്ലാസ്റ്റേഴ്സിലേക്കുള്ള വരവ്.
ജന്മഭൂമി ഓണ്ലൈന്