ന്യൂദല്ഹി: രാജ്യത്ത് കൊറോണ രോഗശമന നിരക്ക് 27.52 ശതമാനമായി ഉയര്ന്നതായി കേന്ദ്ര ആരോഗ്യ മന്ത്രാലയം. കഴിഞ്ഞ 24 മണിക്കൂറിനുള്ളില് 1,074 പേര്ക്ക് രോഗം ഭേദമായി. ഒരു ദിവസം കൊണ്ട് രോഗം ഭേദമാവുന്നവരുടെ ഏറ്റവും ഉയര്ന്ന എണ്ണമാണ് ഇത്. രാജ്യത്ത് ഇതുവരെ 11,706 പേരുടെ രോഗം ഭേദമായെന്നും മന്ത്രാലയം ജോയിന്റ് സെക്രട്ടറി ലവ് അഗര്വാള് പറഞ്ഞു. ഏപ്രില് 30ന് 630 പേരുടെ രോഗം ഭേദമായി. അന്ന് രോഗം ഭേദമാവുന്നവരുടെ നിരക്ക് 25.19 ശതമാനമായിരുന്നു. ഏപ്രില് 28നാവട്ടെ അത് 23.3 ശതമാനം, അദ്ദേഹം പറഞ്ഞു.
കഴിഞ്ഞ 24 മണിക്കൂറിനുള്ളില് രാജ്യത്ത് 2,553 പേര്ക്ക് രോഗം ബാധിച്ചതോടെ മൊത്തം രോഗബാധിതരുടെ എണ്ണം 44,532 ആയി. പത്തു സംസ്ഥാനങ്ങളില് ആയിരത്തിലേറെ രോഗികളുണ്ട്. ഇതുവരെ 1,373 പേര് മരിച്ചു. മഹാരാഷ്ട്രയിലും ഗുജറാത്തിലും മധ്യപ്രദേശിലുമാണ് കൂടുതല് പേരും മരിച്ചത്. ഏറ്റവുമധികം പേര്ക്ക് രോഗം പിടിപെട്ട മഹാരാഷ്ട്രയില് 12,974 പേര്ക്ക് വൈറസ് ബാധ സ്ഥിരീകരിച്ചു. 548 പേര് മരിച്ചു. ഗുജറാത്തില് രോഗികളുടെ എണ്ണം 5428 ആയി. ദല്ഹിയില് 4549 പേര്ക്കാണ് രോഗം ബാധിച്ചത്.
കൊറോണ ബാധിച്ചവരിലെ മരണ നിരക്ക് ഏറ്റവും കൂടുതല് ബംഗാളില്. 12.8 ശതമാനം. ദേശീയ ശരാശരി 3.2 ശതമാനമാണ്. സംസ്ഥാന സന്ദര്ശനം കഴിഞ്ഞ് മടങ്ങിയ, അപൂര്വ ചന്ദ്രയുടെ നേതൃത്വത്തിലുള്ള കേന്ദ്ര സംഘം ഇക്കാര്യം സംസ്ഥാന ചീഫ് സെക്രട്ടറി രാജീവ് സിന്ഹയെ അറിയിച്ചു. ബംഗാളില് രോഗം ബാധിച്ചവര് 963 ആണ്. മരണം 35. രോഗമുക്തി നേടിയവര് വെറും 151. ബംഗാളില് മരണ നിരക്ക് കൂടാന് കാരണം പരിശോധന വളരെക്കുറവായതും ദുര്ബലമായ നിരീക്ഷണവുമാണ്, അപൂര്വ പറഞ്ഞു.
അതിനിടെ, ദല്ഹി, മഹാരാഷ്ട്ര, ഛത്തീസ്ഗഢ്, രാജസ്ഥാന്, ഹിമാചല്പ്രദേശ് സംസ്ഥാനങ്ങളില് ഇന്നലെ മദ്യശാലകള് തുറന്നു. ഇവിടെയെല്ലാം വന്തിരക്കുണ്ടായി. ദല്ഹിയില് ഇന്നലെ തുറന്ന മദ്യശാലകളില് ആളുകള് സാമൂഹിക സുരക്ഷിതത്വ നിര്േദശങ്ങള് പാലിക്കാതെ കൂട്ടമായെത്തിയതോടെ പലതും അടച്ചു. തൊണ്ണൂറിലേറെ കൊറോണ തീവ്രബാധിത മേഖലകളുണ്ടായിട്ടും മദ്യശാലകള് തുറക്കാനുള്ള ദല്ഹി സര്ക്കാരിന്റെ നീക്കത്തിനെതിരെ വന് പ്രതിഷേധമുയര്ന്നു. കൊറോണ പ്രതിരോധത്തിന് ലോകാരോഗ്യ സംഘടനയുടെ നേതൃത്വത്തില് നടക്കുന്ന മരുന്ന് പരീക്ഷണത്തില് ഇന്ത്യയും ഭാഗമാകുമെന്ന് കേന്ദ്ര ആരോഗ്യമന്ത്രി ഡോ. ഹര്ഷ്വര്ധന് അറിയിച്ചു.
