കൊച്ചി: കശുവണ്ടി കോര്‍പ്പറേഷന്‍ അഴിമതിക്കേസില്‍ കോടതിയെ കുറ്റപ്പെടുത്തുന്ന തരത്തില്‍ പ്രോസിക്യൂഷന്‍ അനുമതി ഉത്തരവിറക്കിയ വിഷയത്തില്‍ വ്യവസായ വകുപ്പ് പ്രിന്‍സിപ്പല്‍ സെക്രട്ടറി കെ. ബിജു ഹൈക്കോടതിയില്‍ തിരുത്തിയ മാപ്പപേക്ഷ സമര്‍പ്പിച്ചു. നേരത്തെ സമര്‍പ്പിച്ച മാപ്പപേക്ഷ ഹൈക്കോടതി രൂക്ഷമായ വിമര്‍ശനത്തോടെ തള്ളിയതിനെത്തുടര്‍ന്നാണിത്. കോടതിയുടെ സമ്മര്‍ദ്ദത്തെ തുടര്‍ന്നാണ് പ്രതികള്‍ക്കെതിരെ പ്രോസിക്യൂഷന്‍ അനുമതി നല്‍കിയതെന്ന ധ്വനി ഉത്തരവില്‍ ഉണ്ടെന്നായിരുന്നുവെന്ന് കോടതി അന്ന് വിലയിരുത്തയത്. എന്നാല്‍ ഇതു സംബന്ധിച്ച മാപ്പപേക്ഷ വ്യക്തതയില്ലെന്ന് ചൂണ്ടിക്കാട്ടി കോടതി അന്ന് തള്ളുകയും ചെയ്തു. കോടതിക്കെതിരെ ഇത്തരം പരാമര്‍ശങ്ങള്‍ നടത്തിയാല്‍ ഒരു സര്‍ക്കാരിനും സംരക്ഷിക്കാന്‍ കഴിയില്ലെന്ന് ഓര്‍ക്കണമെന്ന് ഹൈക്കോടതി മുന്നറിയിപ്പ് നല്‍കുകയും ചെയ്തു. ഇതോടെയാണ് പുതിയ മാപ്പപേക്ഷ നല്‍കേണ്ടിവന്നത്.
കേസില്‍ പ്രഥമദൃഷ്ട്യാ തെളിവുകളുണ്ടെന്ന് ബോധ്യപ്പെട്ടതിന്റെ അടിസ്ഥാനത്തിലായിരുന്നു പ്രോസിക്യൂഷന്‍ അനുമതി നല്‍കിയതെന്ന് പുതിയ സത്യവാങ്മൂലത്തില്‍ പറയുന്നു.
